Ұлттық домбыра күніне арналған айлық іс-шараның салтанатты ашылуы мәдениет үйі алаңында кеңінен аталып өтті

Бүгін Амангелді жерінде шанағынан төгілген күй тербеп, домбыраның қоңыр үнімен дала тыныстағандай болды. Ұлттық домбыра күніне арналған айлық іс-шараның салтанатты ашылуы мәдениет үйі алаңында кеңінен аталып өтті.

Посмотреть эту публикацию в Instagram

Публикация от ⚜️ҚОШ КЕЛДІҢІЗ⚜️ (@culture_amangeldy)

Қазақтың киелі аспабы — домбыраның шанағынан төгілген әуенмен шара шымылдығы ашылды. Мәдениет үйі алаңының төрінде қатар тізілген 65 домбырашының бір мезетте төккен Құрманғазының “Балбырауын” мен Н. Тілендиевтің “Әлқисса” күйлері тыңдаған жанды тебірентпей қоймады. Бұл – шын мәнінде, рухтың жаңғыруы, елдік пен ұлттық рухтың үн қосуы болды. Домбыраның әрбір үні – баба тарихтың, ерлік пен елдіктің үнсіз шежіресін шерткендей.
Домбырашылар ансамблінің жетекшісі әрі дирижері - Кенжеболат Ахметов. Оның шебер басқаруымен орындалған бұл күй шеруі көрермендердің көңілінен шығып, зор қошеметке ие болды.

Шара барысында Амангелді ауданының әкімі Қанат Уәшұлы Кеделбаев пен “AMANAT” партиясы қоғамдық бірлестігінің аудандық филиалының төрағасы Марал Мұратбекұлы Досымов жүрекжарды құттықтау сөз сөйлеп, елдің рухани тірегі болған қара домбыраның мәні мен маңызын айшықтап өтті.

Күйге сүйсініп, ұлттық өнерге бас иіп келген 120-дан астам көрермен – аудан мекемелерінің басшылары мен қызметкерлері, зиялы қауым өкілдері және аудан тұрғындары – домбыра үнімен тербелген рухани кештен зор әсер алды.