Қостанай қаласы еліміздің ұлттық мерекесі – Республика күнін жоғары деңгейде атап өтті.
Шаһар басшысы Марат Жүндібаевтың қатысуымен салтанатты іс шара ұйымдастырылып, қаланың өркендеуіне елеулі үлес қосып жүрген бірқатар азаматтарға Құрмет грамоталары мен алғыс хаттар табысталды.
Салтанатты жиынға қатысушылар ҚР Мемлекеттік Туына қарап бой түзеп, Әнұранды шырқады. Ресми рәсімнен соң қала әкімі мінбеге көтеріліп, Қостанайдың ел экономикасын дамытуға қосып жатқан үлесін, соңғы жетістіктерді және жаңа жобаларды паш етті.
«Тәуелсіздік бәрінен қымбат. Оны нығайту халықтың бірлігіне, адал еңбегіне және әр азаматтың туған жерге деген жанашырлығына байланысты. Қостанайдың тарихында түрлі этнос өкілдерінің ортақ еңбегі мен өзара құрметі ерекше орын алады. Аға буының салып кеткен сара жолын жалғап, қаланы көркейтіп, келер ұрпаққа жеткізуге міндеттіміз. Мереке қарсаңында облыс орталығында 45 метрлік Мемлекеттік Ту орнатылып, жаңа тұғыр ашылып отыр. Нышан елдігімізді айшықтап, рухымызды асқақтатын болады», — деді ол құттықтау сөзінде.
Сондай-ақ қаланың әлеуметтік-экономикалық көрсеткіштеріне тоқталып, жаңа жобаларды таныстырды. Әкімнің айтуынша, қостанайдағы өнеркәсіп өндірісінің көлемі 1 триллион 200 млрд теңгеден 2 триллион теңгеге жеткен. Ал инвистиция көлемі 141 млрд теңгеден 385 млрд теңгеге дейін өсті.
Бұл сандардың артында жаңа кәсіпорындар, тұрақты жұмыс орындары және соны мүмкіндіктер тұр. Соңғы жылдары Қостанайға шетел инвесторлары көбірек келіп, әлемге танымал команиялар ынтымақтастық орнатуда. Бүгінде халықаралық Novotel қонақүйінің құрылысы жүргізілуде. Болашақта Holiday Inn Express қонақүйін салу жоспарлануда. Бұдан бөлек жақында Invictus GO фитнес-клубы ашылады. Халықаралық қонақүйлер желісінің Қостанайға келуі қалада туризмді дамытуға мүмкіндік бар екенін көрсетеді.
Тұрғындардың тұрмысын жақсартып, өмір сапасын арттыру жолында еңбек етіп жүрген жергілікті кәсіпкерлердің де еңбегі зор. Республика күні қарсаңында үздік қызмет көрсетушілер мен кәсіп иелері арасында ұйымдастырылған «Халық сапасы» қалалық байқауының қорытындысы шығарылды. Тауар өндірушілердің жұмысы «Қостанайда жасалған», «Қазақ бренді», «Нан – берекенің бастауы», «Халық алғысы», «Бала қуанышы», «Жылы жүрек» сияқты аталымдарға топтастырылған.
«Qazaq бренд» дүкендер желісі халықтың дауыс беруі нәтижесінде «Қазақ бренді» бағытында үздік шықты. Оның иесі Гүлнұр Кәкімбек ұлттық тағамдарды насихаттап жүр.
«Бұл марапаттың Ұлттық мереке қарсаңында бұйырып отырғаны үлкен қуаныш. Біздің дүкендердің ұстанымы ұлттық тәттілерді насихаттау. Сондықтан ерекше толқып тұрмын. Бізге дауыс беріп қолдаған барша тұтынушыларға алғыс білдіремін», — деді ол.
Облыс бойынша «Qazaq бренд» дүкенінің бес филиалы бар. Айына жарты миллион тоннадай өнім шығарып, сатады. Табиғи тәттілерді Қазақстанның өзге де қалаларына тасымалдауда.
Қымбат ДОСЖАНОВА
