Аудандық мәдениет үйінде ҚР Конституциясының 30 жылдығы аталып өтті

Аудандық мәдениет үйінде Қазақстан Республикасының Конституциясының 30 жылдығына арналған «Ата заң – ел тірегі» атты салтанатты концерттік бағдарлама ұйымдастырылды.

Шараның шымылдығы «Ата заңым – айбыным» атты сахналық қойылыммен ашылды. Театрландырылған көріністе ел тарихындағы маңызды кезеңдер, мемлекеттік рәміздер мен Ата заңның елдіктің тұғыры ретіндегі маңызы көрініс тапты.

Жиынға аудан әкімі, мекеме басшылары, ардагерлер мен зиялы қауым өкілдері, жастар және аудан тұрғындары қатысты. Шараның ашылуында аудан әкімі құттықтау сөз сөйлеп, еліміздің Тәуелсіз мемлекет ретінде қалыптасуында Конституцияның маңызы ерекше екенін атап өтті. Ол Ата заңның әрбір қазақстандық үшін еркіндік пен теңдіктің кепілі екенін жеткізіп, мерекемен аудан жұртшылығын құттықтады.

Сонымен қатар, ел дамуына сүбелі үлес қосып жүрген бірқатар азаматтарға аудан әкімінің атынан марапаттар табыс етілді. Бұл – олардың еңбегіне деген қоғам мен елдің құрметі екенін айғақтайды.

Мерекелік жиын әрі қарай аудан өнерпаздарының концерттік бағдарламасымен жалғасын тапты. Сахна төрінде патриоттық әндер шырқалып, күмбірлеген күйлер орындалып, ұлттық билер көрермендерге көтеріңкі көңіл-күй сыйлады. Өнерпаздар ұсынған қойылымдар мен музыкалық шығармалар елдігімізді, тәуелсіздігімізді және Ата заңымыздың қадір-қасиетін паш етті.

Конституция күніне арналған салтанатты шара көрермендердің жүрегінен орын алып, елдік бірлікті нығайтатын, рухани серпін сыйлайтын тағылымды мерекеге айналды.