Құтжан Қанжығалиннің " Інжудей асыл сөзді жырмен төктім"атты кітабы Қостанай қаласының "Қарлығаш" баспасында өңделіп, басылып шықты.
Бүгін орталық кітапхананың залында жерлесіміз, айтыс ақыны, әнші-сазгер, өнердің дарабозы Құтжан Қанжығалиннің " Інжудей асыл сөзді жырмен төктім"атты кітабы Қостанай қаласының "Қарлығаш" баспасында өңделіп, басылып шықты. Кітапта ақынның әр жылдардағы айтыстары, термелері мен өлеңдері, сондай-ақ ақын туралы замандастарының естеліктері берілген.
Кітаптың жарыққа шығуына себепкер ақынның ұрпағы, алтынның сынығы, еңбек ардагері, Амангелді ауданның Құрметті азаматы, қос орденді ақын,85 жастың сеңгіріне келген Төлеутай Құтжанова.
Қазақта мақал бар ғой "Ұлы бардың өзі бар, қызы бардың ізі бар" дегендей, артында қалған қыздары әке мұрасын көзінің қарашығындай сақтап, өскелең ұрпаққа жеткізіп отырғандары осы даналық сөздің айқын айғағы.
Кітаптың тұсауын аудан әкімі Т. Т. Карбозов пен еңбек ардагері, ақынның көзін көрген інісі Уахитов Балтабай ақсақал қиса, белгілі айтыс ақыны Балтасар Ізтелеуов пен ақынның ұрпағы, айтыс ақыны, айтыс тарихында алғаш ақ боз мінген қыз, ҚР "Мәдениет саласының үздігі" төсбелгісінің иегері Жадыра Құтжанова жырдан шашу шашып, арнау арнады.
Еңбек ардагері Балта Нұрғожин ақсақал мен ауданымызда белгілі кәсіпкер, мәдениет жанашыры Нұрлыбек Әлмағанбетовтер естелік әңгімелерін ортаға салды. Төлеутай апайдың әріптесі, дәрігер Жұмакүл Отарбайқызы кітаптың тұсау кесерімен құттықтап, жылы лебізін білдірді.
Ақынның қызы Шарбат Құтжанқызы әкесінің әндерін домбырамен орындаса, шөбересі Нұрсұлтан Есжанов пен мәдениет үйінің жас әншісі Асылхан Дүйсенғали сазды әуендерден ән шашу арнады.
Кітапхана қызметкерлері дайындаған "Құтты жырдың-Құтжаны"-атты көрмесі ақынның өмір жолы мен ұрпақтарына арналған мағыналы болды.
Іс шара соңында Төлеутай Құтжанова жиналған қауымға алғысын айтып, жастарға аналық батасын берді.
Ақынның жарық көрген жаңа кітабын қалың оқырман орталық кітапханада оқи алады.
