Аудан әкімі мен мекеме басшыларының қатысуымен Президент Қасым-Жомарт Тоқаевтың “Егемен Қазақстан” газетіне берген сұхбатына орай дөңгелек стол өткізілді. Президент Қасым-Жомарт Тоқаевтың «Егемен Қазақстан» газетіне берген көлемді сұхбаты ел ішінде қызу талқыланып жатыр. Онда Мемлекет басшысы «Қаңтар оқиғасы» мен елде орнады делінген қос билікке қатысты сұрақтарға ашық жауап берген. Әрі былтыр атқарылған істер мен алдағы жоспарлар жайлы айтқан. Зорлық зомбылық жасағандарға жазаның күшейетінін мәлімдеп, атом электр станциясын салу мәселесіне кезекті рет тоқталған. Тұңғыш президенттің мемуары жайлы сұраққа да жауап берген. Осыған орай аудан әкімі және мекеме басшылары арасында талқылау жүргізілді.

Президенттің «Егемен Қазақстан» газетіне берген сұхбаты жан-жақты. Қасым-Жомарт Тоқаев әуелі 2023 жылы атқарылған жұмыстарға тоқталған. Оның айтуынша былтыр Конституциялық сот жұмысын бастады. Мәжіліс пен мәслихат депутаттарын жаңа ереже бойынша сайлап, аудан қала әкімдерін таңдадық. Ұлттық қордан балаларға қаржы бөлінетін болды. Экономиканы әртараптандыру және монополиядан арылту, инфрақұрылымды жаңғырту, бизнесті қолдау, инвестиция тарту жұмыстары мықтап қолға алынды. Бұл жұмыстар биыл да жалғасын табады.