Облысымыздың аудандық, ауылдық мәдени ошақтарының жұмыстарымен таныстыру мақсатында «Ауыл тынысы» рубрикасын ұсынамыз! Амангелді ауданының Есір ауылдық клубы
Амангелді ауданының Есір ауылдық клубы
Есір ауылдық клубы 2012 жылы жергілікті тұрғындардың сұрауымен мектеп жанынан құрылды. 2018 жылдың наурыз айында «Көркейе бер, Қостанай» акциясы және «Рухани жаңғыру» бағдарламасының «Атамекен» кіші бағдарламасы аясында, Нұр-Сұлтан қаласының 20 жылдығы, Амангелді ауданының 90 жылдығына орай Есір ауылдық клубына күрделі жөндеу жұмыстары жасалынды.
Жөндеу жұмыстарына «Нұрай Н» ШҚ басшысы - Б.Тілеубаев, «Жеңісбек» ЖШС директоры - М.Шаяхметов, «Алюминстрой» ЖШС директоры - А.Мұқанов және т.б. кәсіпкерлер қаржылай көмек көрсетті. Сонымен қатар, клубқа керекті құрал-жабдықтар алу мақсатында жергілікті бюджеттен қаржы бөлінді. Ауылымыздың өркендеуіне өз үлестерін қосқан азаматтарға алғысымыз шексіз!
Есір ауылдық клубының әдіскері Изтелеуов Балтасар Тұрысбекұлы - облыстық меценаттар клубы «Шабыт» сыйлығының лауреаты, Амангелді жастарының Алтын кітабына есімі жазылған, «Жас педагог ұстаз» төсбелгісінің иегері. Жұбайы - Кайнекешова Айнұр Тұрлыбекқызы өнерден алыс емес, ауылда кітапханашы болып қызмет атқаруда. Осылайша ерлі-зайыпты қос маман ауыл тұрғындарын мәдени іс-шаралармен қуантуда.
Клубта төрт жанр бойынша үйірмелер жұмыс жасайды: хореография, вокал, аспаптық жанр және жас ақындар үйірмелері. Есір ауылдық клубы жыл басында бекітілген жоспар бойынша жемісті жұмыс жасап келеді. Ай сайын аудандық мәдениет үйінің әдістемелік кабинет меңгерушісіне есеп беріп отырады.
2020 жылдың алғашқы атқарылған іс-шарасы «Екі дүние сардары» Мұхамед пайғамбарымыздың туған күні Мәуліт мерекесін тойлаумен басталды.
Жас маман, айтыскер ақын - Балтасар Изтелеуов үнемі шығармашылық ізденіс үстінде, аудандық байқаулар мен іс-шараларға белсенді қатысып отырады.
Қ.Әбенов атындағы аудандық мәдениет үйінің
әдістемелік кабинет меңгерушісі
Л.Т. Мизамбаева
