Айтыс ақындары мен жыршы-термешілердің халықаралық одағының Қостанай облысында филиалын ашу жөнінде мәжіліс өтті

Жиналыс барысында Айтыстың ақтаңгері Айбек Қалиев филиалдың өңірімізде қажет екендігін айтып, жетекшісі ретінде айтыскер ақын Салтанат Өтелбаеваны тағайындау жөнінде ұсыныс білдірді.

Бұл ұсынысты одақтың басқарма төрағасы Жүрсін Ерман Молдашұлы қолдады.

Елімізге танымал айтыс ақындарының қатысуымен өткен жиында Қостанай облысы мәдениет басқармасының «Облыстық көркемөнерпаздар халық шығармашылық және кинобейнеқор орталығы» МКҚК басшысы Қалқаев Дамир Елтайұлы мен Солтүстік Қазақстан облыстық халық шығармашылығын дамыту орталығының директоры Мұқанов Жанболат Темірболатұлы өңірде айтыс өнерін дамыту, өзара шығармашылық байланыс орнату жөніндегі меморандумға қол қойды.

Айтыс ақындары мен жыршы-термешілердің халықаралық одағының Солтүстік Қазақстан облысы бойынша филиалының жетекшісі Жұпархан Жарқын алдағы уақытта аймақтық оқушылар айтысы ұйымдастырылып, өңірдегі жас ақындардың өнерін дамытуына ықпал болатыны жөнінде айтты.

Бұл ретте Қостанай облысының айтыскер ақындары Марғұлан Оспанов, Медет Байзақов өз ойларын ортаға салды.

Одақ өкілі, айтыскер ақын Шұғайып Сезімхан жыл сайын дәстүрлі түрде өткізіліп тұратын Республикалық оқушы ақындар айтысына облыстық айтыстарда жеңімпаз болған жас ақынды жіберіп отыру жөнінде айтып өтті. Айтыс өнері жөнінде Қостанай облысы ақындарының қатысуымен көркемдік кеңес өткізілетін болады.

Жуырда ашылатын айтыс ақындары мен жыршы-термешілердің халықаралық одағы Қостанай облысының филиал жұмысымен Қостанай облысы мәдениет басқармасының «Облыстық көркемөнерпаздар халық шығармашылық және кинобейнеқор орталығы» МКҚК айналысатын болады.