Бүгін Қостанай облысы әкімдігі мәдениет басқармасының «Облыстық көркемөнерпаздардың халық шығармашылығы мен кинобейнеқор орталығы» КМҚК ұйымдастыруымен Қостанай ауданы, Тобыл қаласы «Алтын дән» мәдениет үйінде «Шаңырақ» Ұлттық өнер орталығында «Ұрпақтар сабақтастығы» тақырыбында Алпысовтар отбасымен кездесу өтті.
Кездесу Елбасының «Ұлы даланың жеті қыры» бағдарламалық мақаласындағы «Дала фольклоры мен музыкасының мың жылы» арнайы жобасы негізінде халық ауыз әдебиетінің таңдаулы үлгілері қиссалары мен жырларын сақтау және жыршылық өнерді насихаттау мақсатында өткізілді.
Кездесу кешінде белгілі жыршы, термеші Нағашыбай Алпысов І.Жансүгіровтың «Құлагер», Н.Ахметбековтың «Есім сері» дастандарынан үзінді орындап, Тобыл-Торғай өңірінің жыршылық мектебінің тарихы жөнінде әңгімелеп берді.
Жыршының жолын қуып, дәстүрлі өнердің дамуына үлес қосып жүрген балалары Абзал, Серік, Әбдрахман Алпысовтар жыр, терме, авторлық әндерін орындап, ұлттық өнер жайында өз ойларын ортаға салды.
Кездесу соңында облыстық көркемөнерпаздардың халық шығармашылығы мен кинобейнеқор орталығының көркемдік жетекшісі А.Кушкимбаева Алпысовтар отбасына шығармашылық табыс тілеп, Мәдениет басқармасының басшысы Е.Қалмақовтың алғыс хатын табыстады.
