Бүгін Қостанай облысы әкімдігінің мәдениет басқармасына қарасты «Облыстық көркемөнерпаздардың халық шығармашылығы мен кинобейнеқор орталығы» КМҚК ұйымдастыруымен 2022 жыл жоспарын талқылауға арналған отырыс өтті.
Жиынға Е.Өмірзақов атындағы Қостанай облыстық филармониясының қазақ ұлт аспаптар оркестрінің көркемдік жетекшісі, ҚР Мәдениет саласының үздігі Батырбек Байназаров, Е.Өмірзақов атындағы Қостанай облыстық филармониясының қазақ ұлт аспаптар оркестрінің домбырашысы, дарынды күйші Данияр Рысбек, дәстүрлі әнші Талғат Молдағалиев, ақын, журналист Жандос Жүсіпбек, жетіген аспабының ұстазы Әсем Искакова және Облыстық көркемөнерпаздардың халық шығармашылығы мен кинобейнеқор орталығының басшысы Дәмер Қалқаев бастаған ұжым қатысты.
Отырыс барысында 2022 жыл обылыстық, республикалық деңгейде өтетін ұлттық өнер түрлерінен өтетін байқаулар, шеберлік сағаттар жоспары пысықталды. Олардың өту мерзімдері мен бағыттары, мән-маңызы туралы ұсыныс-пікірлер ортаға салынды.
Атап айтар болсақ, биыл дәстүрлі «Жас тұлпар» облыстық оқушылар айтысы жалғасын табады. Сондай-ақ, «Арқада Наушабайдың Нұржаны өткен...» республикалық дәстүрлі әншілер байқауы әдеттегіден өзгерек мазмұнда, жетілдірілген түрде өткізілмек. Мұның сыртында, осы жылы Қазыбек Әбенов атындағы «Торғай толғауы» республикалық қобызшылар байқауының тұсауы кесілгелі отыр. Сатирик, жазушы, этнограф, ғалым Сейіт Кенжеахметұлы атындағы «Мірдің оғы» республикалық әзіл-сықақ фестивалі де жоғары деңгейге көтеріліп, бұл жолы елордада өткізу жоспарда бар. Тағы бір ерекше жоба – «Күмбірле, домбыра» атты облыстық күйшілер байқауы да өңірдегі жас өнерпаздардың басын біріктірмек. Сонымен қатар, алдағы уақытта шертершілер мен жетігеншілер байқауын өткізу жоспарға енгізілген. Ұлттық өнерді дәріптеуге арналған шеберлік сағаттары да үздіксіз ұйымдастырылып, оған өз саласының білгір мамандары дәріс оқып, бай тәжірибелерімен бөліспек.
Бір сөзбен айтқанда, осы жылы да облыстың мәдени өмірінде ұлт өнерін ұлықтау бағытында көптеген рухани маңызды оқиға өткелі отыр.
