Қостанай облысы әкімдігі мәдениет басқармасының «Облыстық көркемөнерпаздардың халық шығармашылығы мен кинобейнеқор орталығы» ұйымдастыруымен 2020 жылдың 31 қаңтар күні Ы.Алтынсарин атындағы дарынды балаларға арналған мектеп-интернатында Ы.Алтынсарин негізін қалаған тұңғыш мектебінің 135-жылдығына орай өткізілетін «Жас тұлпар» облыстық оқушылар айтысы қарсаңында «Қазіргі айтыс: жетістіктер мен кемшіліктер» тақырыбы бойынша шеберлік сағаты өтті

Шеберлік сағатын «Құрмет» орденінің иегері, ҚР Мәдениет саласының үздігі, филология ғылымдарының кандидаты, белгілі ақын - Айбек Киікбайұлы Қалиев жүргізді.

Шеберлік сағатында айтыс өнерінің даму кезеңдері мен
қазіргі айтыстағы суырыпсалмалық мәселесі жөнінде кеңінен айтылды. Жетекшілерге жас ақындарды дайындау барысында суырыпсалмалық, аспапта ойнау әртістік қабілетімен қатар, айтыс ақыны болу үшін білімді жан-жақты болу қажет, сол үшін көркем әдебиетті көп оқуға талап қойып, сахна мәдениетін үйрету қажет - деді Айбек Киікбайұлы.

Тәжірибелік сағатында оқушы ақындар шағын айтыс көрсетіп, ақыл кеңес алды.

Облыстық көркемөнерпаздардың халық шығармашылығы мен кинобейнеқор орталығының басшысы Қалқаев Дәмер Елтайұлы облысымызда айтыс өнерін дамыту мәселесіне тоқталып, жас ақындарды аудан көлеміндегі мәдени іс-шараларға қатыстырып, сахнаға төселдіру қажет дей келе, "Жас тұлпар" айтысынан жүлделі орын алған ақынға республикалық айтысқа жолдама берілетінін айтты.

"Жас тұлпар" айтысына қатысатын оқушы ақындармен әлі де орталық мамандары байланыста болып, дайындық барысы қадағаланып отырылатын болды.

Іс-шараға қатысушылар Ы.Алтынсарин атындағы дарынды балаларға арналған мектеп-интернатымен танысып, Ы.Алтынсарин мемориалдық музейіне саяхат жасады.

Шеберлік сағатына Қостанай, Тобыл, Рудный, Арқалық қалаларымен қатар Бейімбет Майлин, Әулиекөл, Меңдіқара, Қарабалық, Ұзынкөл, Жанкелдин, аудандарының оқушы ақындары мен жетекшілері қатысты.

Іс-шара соңында жас ақындар мен жетекшілеріне қатысу сертификаттары табысталды.
Шеберлік сағатын өткізуде қолдау көрсеткені үшін Ы.Алтынсарин атындағы дарынды балаларға арналған мектеп-интернаты ұжымына алғыс білдіреміз!