«Арқада Наушабайдың Нұржаны өткен». Қостанай ауданында республикалық дәстүрлі ән орындаушылардың байқауы мәресіне жетті. Еліміздің түкпір-түкпірінен келген 15 әнші екі күн бойы Нұржан Наушабайұлының, халық композиторларының шығармаларын орындаудан сайысқа түсті.

Наушабайдың Нұржанын көпшілік ақын ретінде жақсы танығанымен, композиторлық қырын біле бермейтіні жасырын емес. Екі күнге ұласқан байқаудың басты мақсаты – тұлға есімін ұлықтап, әндерін насихаттау.

Қостанай жерінде тұңғыш өткізілген байқауға төрелік етуге белгілі жыршы, Қазақстанның еңбек сіңірген қайраткері, фольклоршы-ғалым Алмасбек Алматов арнайы шақырылды. Өнер майталманы мұндай ән додалары арқылы жастардың талабы шыңдала түсетінін айтады.

Бағы жанып, бас жүлдеге ие болған жас талант – Нұр-Сұлтан қаласынан келген Фархад Жәкіш. Ол қанжығасына 500 мың теңге байлап қайтты.

Нұржан Наушабайұлының шығармаларын әлі де халық арасында кеңірек насихаттау маңызды. Келер жылдары ақынның жыр-толғауларын орындаушылар байқауы ұйымдастырылса дейді өнер майталмандары. Ал, бүгінгі сайыс дәстүрлі ән өнерінің бір жеңісі екені даусыз.

Аслан Қанғожин