QOSTANAI TAŃY: Өңірде «Дерт» толықметражды көркем фильмінің түсірілімі басталады
Қостанайда үлкен киноның жаңа қозғалысы басталады. «Дерт» толықметражды драмалық көркем фильмінің негізгі түсірілім тобы бүгін Тобыл топырағына табан тигізді. Қонақтарды жергілікті қауым теміржол вокзалы басынан сән-салтанатымен күтіп алды.
«Дерт» фильмі 28 CINEMA және NEXT SCENE компанияларының бірлескен өндірісінде, Қостанай облысы әкімдігінің қолдауымен түсіріледі. Жобаның түсірілімі Қостанайда және жалпы облыс аумағында өтеді. Жұмыс бір айға жуық уақытқа созылмақ. Жоба авторларының айтуынша, өңір – фильм үшін жай ғана түсірілім алаңы емес, оқиғаның атмосферасын айшықтайтын маңызды көркем кеңістік. Тобыл-Торғайдың дархан даласы, алтын астығы жайқалған алқаптары, табиғи ландшафты, қала сәулеті мен тыныс-тіршілігі фильмнің визуалды әлеміне арқау болады. Өңірдің табиғаты мен өзіндік болмысы картина оқиғасының тереңірек ашылуына ықпал етіп, экран арқылы Қостанайдың ерекше келбеті кең аудиторияға танылғалы отыр.
— «Біраз жерде түсіреміз. Ертең, алдымен, Қостанайға келуімізге себеп болған егін алқаптарынан бастасақ деп отырмыз. Осы өңірге келуіміздің басты себебі де сол. Сұлбасын құрған кездегі басымызға келген алғашқы сахна. Басты кейіпкер негізгі көлемді монологын бидай танабында, комбайнда оқуға тиіс. Бұл жақ бізге бөтен болмағандықтан, таңдауымыз бірден осы облысқа түсті. Дәнді даладан бөлек, қала ішінде де алдын ала таңдалған локациялар өте көп. Көшелерде, әлеуметтік және мәдени нысандарда, сондай-ақ сценарийге сәйкес таңдалған басқа да алаңдарда жалғасады», – дейді сценарий авторы әрі қоюшы режиссері, Қазақстанның еңбек сіңірген қайраткері Назгүл Қарабалина.
Әуел баста фильм сценарийін Төлен Әбдіктің бір шығармасы желісімен түсіру көзделіпті. Кейін сюжеттер өзгере келіп, өз алдына бөлек шығарма түзілген. Үлкен драма тағдыр мәселесін арқау етеді. Екі дос арасындағы айтылмай қалған сырдың, қилы жағдайдың салдарынан туындаған оқиғалармен өрбиді. Бала кездерінде белгілі бір себеппен жолдары қақ жарылған, көп жыл бір-бірін кінәлап келген ескі достардың басы көп жылдан кейін қайта түйіседі. Шым-шытырық туынды қазақ киносының қоржынына олжа болып қосылғалы отыр. Тағы бір айта кетері – ауқымды киножоба өңірдегі шығармашылық қозғалыстың жандануына да жаңа серпін. Түсірілім барысында жергілікті мамандарды, шығармашылық өкілдерін, кәсіпкерлер мен қызмет көрсету саласын жобаға тартуға мүмкіндік туады.
— «Фильм түсіріліміне біраз жергілікті актер де тартылады. Ал басты рөлдерді алматылық әртістер ойнайды. Сценарий соларға арналып жазылды. Жергілікті тұрғындар үшін де көпшілік көрініс үшін кастинг жарияланды. Үшінші күн жүріп жатыр. Қызығушылық танытушылар аз емес. Ниетті жандар көбейсе қуанып қалар едік, адамдардың молырақ болғанын қалаймыз. Өйткені кино түсіру күрделі іс. Күллі команданы Алматыдан алып келе алмайсың. Негізгі топтың құрамы да аз емес. Бүгін бізден кейін тағы бір лек әуе жолымен жетпек», – дейді Назгүл Қарабалина.
Кино сценарийін жазуға Назгүл ханымнан бөлек, Баян Кажнабиева және Жансерік Берікұлы атсалысқан. Қоюшы оператор — Асылхан Мельдебеков. Ал туындыда елге танымал актерлер өнер көрсетеді. Нақтысында, Қазақстанның еңбек сіңірген қайраткері Азамат Сатыбалды, Олжас Тоғымбет, Шұғыла Ешен және жас актриса Айару Бауыржан негізгі рөлдерге таңдалған. Айта кетейік, ерлі-зайыпты Назгүл Қарабалина мен Азамат Сатыбалды Тобыл өңіріне бөтен жандар емес. Фильм түсіруге алғаш рет келіп тұрғанымен, мансабын Қостанай қаласында бастаған актерлер еді. І.Омаров атындағы қазақ драма театрының алғашқы қарлығаштары еді. Енді тұңғыштар мекеніндегі бірінші туындысын қалың қазақ назарына ұсынуға қадам жасап отыр. Түсірілім тобын қарсы алуға барған облыстық Көркемөнерпаздардың халық шығармашылығы мен кинобейнеқор орталығының басшысы Дәмер Қалқаев лебіз айтып, жобаға сәттілік тіледі.
— «Ауқымды жоба аясында өңірімізге келген қадамдарыңызға гүл бітсін. Ойлаған мақсаттарыңызға жетіңіздер. Тобыл төрінде кезекті бір тамаша туынды тұсауының кесілгелі отырғаны баршамыз үшін ерекше қуаныш. Ғұмыры ұзақ, көрермені көп киноға айналсын. Істеріңізге сәттілік!» – деп ілтипат білдірді Дәмер Қалқаев.
Жоба Қостанай облысының мәдени, туристік әлеуетін көрсетуге, өңірдің жағымды имиджін қалыптастыруға және болашақта басқа да отандық әрі халықаралық киножобалардың назарын бұрдыруға ықпал етеді деген үміт бар. Қалың көрермен өлкеміздің көркем табиғатын, шырайлы шаһарын және өңірдің өзіне ғана тән ерекше атмосферасын жаңа қырынан таныры сөзсіз. «Дерт» фильмі жергілікті жастардың да кино өндірісіне деген құлшыныс-қызығушылығын арттыруға жол ашса кәне?!
Ж.Жүсіпбек
Суреттерді түсірген – Василий Васильев
