Бүгін – ардақты ардагер, мәдениет майталманы, жампоз журналист, Қостанай облысының құрметті азаматы Қасымхан ата Алдабергеновтің туған күні.
Қазынакеуде қария ғасыр жастан асып, жаңа жүзжылдықтың табалдырығын аттап отыр. Асыл сүйекті, асқақ еңселі ақсақал ғибратты ғұмырының 101-ші белесіне шықты. Қасымхан атаның өмірі өнеге толы, қос дәуірдің куәсі «тірі тарих» іспетті. Жастығы от пен оқтың ортасында өткен даңқты майдангер, білікті педагог, қаламы ұшқыр журналист, дауысы ұлттың «Алтын қорында» сақтаулы даңғайыр жыршы-жырау, аузымен құс тістеген айтыскер, ақпа ақын.
Тобыл жұрты төбе тұтқан қастерлі тұлғаның туған күні «меншікті мерекесі» ғана емес, жерлестері үшін айтулы датаға айналғалы қашан. Бүгін де өңір азаматтары таңмен таласа ақсақалды құттықтауға шаңырағына арнайы барды.
Олардың қатарында атамыздың қолтаңбасы қалған қарт басылым «Қостанай таңы» газетінің бас редакторы Кенжеш Оразғалиқызы лебіз-тілегін жеткізді.
— «Ардақты Қасымхан ата, сізді бүгінгі 101 жасқа толған туған күніңізбен құттықтаймын! Бұл — ерлік пен қайсарлықтың, рух пен даналықтың тағы бір биік белесі! Алла деніңізге қуат беріп, жасыңызға жас қосылып, әлі талай онжылдықтарды бағындыра беріңіз! Біз сізді қастер тұтамыз, мақтан етеміз, тағылым мен өнеге аламыз! Әжей екеуіңіз есен-сау ел алдында жарқырап жүре беріңіздер! Ұрпақ-балаларыңыз аман болсын! Өзіңізді қалыптасқан игі дәстүріміз бойынша жыл сайын құттықтап келе берейік!» — деді Кенжеш Оразғалиқызы.
Сондай-ақ облыстық мәслихат депутаты, «Еуразиялық банк» АҚ облыстық филиалы төрағасы Қырмызы Жаңбыршина, облыстық Ардагерлер кеңсінің төрағасы Батырбек Ахметов, облыстық Көркемөнерпаздардың халық шығармашылығы мен кинобейнеқор орталығының ұжымы және басқа да мекеме-ұйым басшылары жүрекжарды құттықтауларын арнап, сый-сияпаттарын табыс етті.
Ыстық ықыласқа көңілі өсіп, мерейі тасыған Қасымхан ата ақжарма тілегін айтып, ақ батасын берді. Ағынан жарылып, әсерлі әңгіме-естелік тиегін ағытты.
Айта кетейік, Қасымхан атамыз Мәдениет саласының үздігі, Қостанай облысының құрметті азаматы, Қазақстанның құрметті журналисі, «Ерен еңбегі үшін» медалінің иегері.
Суреттерді түсірген — Василий Васильев
