Шебердің әрбір туындысы — ата-бабадан жеткен асыл мұраны бүгінгі ұрпақпен жалғайтын рухани көпір іспетті. Оның көп жылғы ізденісі мен табанды еңбегінің нәтижесінде бүгінде жеке қорында екі мыңнан астам қазақтың ұлттық ою-өрнегі жинақталған. Соның 500-ге жуығы – автордың төл туындылары. Жылдар бойы ол қазақ оюларының шығу тарихын, мағынасын, қолданылу ерекшелігін зерттеп, жүйелеп, ұлттық өнердің баға жетпес мұрасын сақтап келеді.

 

Шөптібай Байділдин — Әлемдік Шыңғысхан академиясының құрметті академигі, Ыбырай Алтынсарин атындағы Арқалық педагогикалық институтының құрметті профессоры, Абылай хан атындағы алтын медальдің иегері, «Қазына» сыйлығының екі дүркін лауреаты, оюшы, қолөнер шебері әрі жазушы.

 

Оның ұлттық нақыштағы ағаш бұйымдары да көпшілікке жақсы таныс. Қазақы өрнекпен көмкерілген кебежелер, сандықтар, жиһаздар мен тұрмыстық бұйымдар дәстүрлі қолөнердің көркемдігін жаңа қырынан танытып келеді.

 

Шебердің айтуынша, ұлттық өнер өткеннің мұрасы ғана емес, болашақтың да құндылығы болуы тиіс.

 

«Біз ата-бабадан қалған ұлттық мұраны сақтап қана қоймай, оны заман талабына сай дамытуымыз керек. Қазақтың ою-өрнегін тұрмыстық бұйымдарда ғана емес, сәулетте, интерьерде, қоғамдық кеңістіктерде кеңінен қолдануға болады. Ендігі мақсат – жасанды интеллект пен жаңа технологиялардың мүмкіндігін пайдаланып, ұлттық өнерімізді әлемге таныту», – дейді Шөптібай Байділдин.

 

Qazaq Creative Hub алаңындағы көрмеде келушілер шебердің авторлық туындыларын тамашалап қана қоймай, қазақ ою-өрнегінің терең философиясы мен ғасырлар бойы жалғасқан тарихына үңілуге мүмкіндік алды.

 

Шөптібай Байділдиннің өмір жолы – ұлттық мұраны сақтаудың жарқын үлгісі. Оның еңбегі қазақтың ою-өрнегі сәндік элемент қана емес, халқымыздың дүниетанымы, тарихы мен рухани коды екенін тағы бір мәрте дәлелдейді.