Көрменің өзегі – «Qazaq eli» жобасы. Оның басты мақсаты – қазақтың тарихи қайраткерлері мен мәдениет майталмандарының гиперреалистік мүсіндерін жинақтап, болашақта бірегей музей қалыптастыру. Әрбір мүсіннің шынайылығы соншалық, көрермен өзін тарихи тұлғамен бетпе-бет жүздескендей сезінеді.

 

Автордың айтуынша, жоба ұлттық тарихты жаңа форматта таныстыруға бағытталған. Мұнда дәстүрлі өнер мен заманауи технологиялар тоғысып, өткен мен бүгіннің арасын жалғайтын ерекше мәдени кеңістік қалыптасады. Сондықтан бұл туындылар жай ғана мүсін емес, тарихи жады мен ұлттық бірегейлікті дәріптейтін көркем құралға айналып отыр.

 

Айдос Есмағамбетов Қостанай облысының Арқалық қаласында дүниеге келген. Ол Ыбырай Алтынсарин атындағы Арқалық мемлекеттік педагогикалық институтында «Бейнелеу өнері және сызу» мамандығы бойынша білім алған. 2018 жылы «Қазақстанның 100 жаңа есімі» жобасының «Мәдениет» номинациясы бойынша жеңімпаз атанып, гиперреализм жанрында силикон, шыныпластик және басқа да заманауи материалдармен жұмыс істеуді меңгерген ТМД кеңістігіндегі алғашқы шеберлердің бірі ретінде танылды.

 

Мүсіншінің ең танымал туындыларының қатарында Қазақстанның Тұңғыш Президенті Нұрсұлтан Назарбаевтың, Абылай ханның, ұлы ақын әрі ойшыл Абай Құнанбайұлының және халық ақыны Жамбыл Жабаевтың гиперреалистік бейнелері бар.

 

Айдос Есмағамбетов шығармашылығының басты ерекшелігі — таңғаларлық нақтылық. Әрбір әжім, жанардағы сезім, тері бедері, тіпті шаштың әрбір талына дейін аса ұқыптылықпен жасалады. Соның арқасында мүсіндер фотосуреттен де асып түсетін әсер қалдырып, тірі адаммен жүздескендей күйге бөлейді.

 

Шебер өз жұмыстарында силикон, шыныпластик, шыныталшық секілді инновациялық материалдарды пайдаланады. Осындай технологиялардың арқасында адам келбетін барынша табиғи қалпында бейнелеуге мүмкіндік туады. Дәстүрлі мүсін өнері мен заманауи инженерлік шешімдердің үйлесімі автор туындыларының басты ерекшелігіне айналған.

 

Жәрмеңке барысында Айдос Есмағамбетов жобаның негізгі мақсаты ұлттық құндылықтарды заманауи өнер арқылы дәріптеу екенін айтты. Оның айтуынша, алдағы уақытта бұл бағытты роботтандыру және аниматроника технологияларымен ұштастыру жоспарланып отыр.

 

«Біздің мақсатымыз – Қазақстан тарихы мен мәдениетін жастарға заманауи тілде жеткізу. Ұлы тұлғалардың бейнесін шынайы түрде көрсету арқылы өскелең ұрпақтың тарихи мұраға деген қызығушылығын арттырып, өткенмен рухани байланысын күшейтуді көздейміз», – дейді мүсінші.

 

Айдос Есмағамбетовтің көрмесі QOSTANAI CREATIVE CULTURE жәрмеңкесіндегі ең көп тамашаланған экспозициялардың біріне айналды. Бұл жоба креативті индустриялардың тек жаңа өнер туындыларын жасап қана қоймай, Қазақстанның бай тарихи-мәдени мұрасын заманауи форматта таныстыруға да зор мүмкіндік беретінін айқын көрсетті.