Қостанай облысының атынан жәрмеңкеге белгілі айтыскер ақын, «Алтын домбыра» иегері, филология ғылымдарының кандидаты Айбек Қалиев арнайы қатысып, ұлттық өнердің мәні мен руханияттың сабақтастығы туралы ой бөлісті. Ақынның арнауы мен тағылымды әңгімесі жиналған жұртшылықтың зор ықыласына бөленді.

 

Бұған дейін «Алтын домбыра» тек жеңімпаз ақынның өңірінде сақталып келген болса, енді алғаш рет Астана тұрғындары мен қала қонақтары оны жақыннан тамашалау мүмкіндігіне ие болды. Көпшілік қасиетті домбыраның жанында суретке түсіп, қазақ айтысының ең жоғары марапатын өз көзімен көруге асықты.

 

Сахна төрінде сөз алған Айбек Қалиев Қостанай өңірінің шығармашылық әлеуетін, қазақ өнерінің өміршеңдігін және ұлттық рухтың мәңгілік құндылығын жырға қосты.

 

«Creative Aimaq – ұлттық мұраны жаңа заманның тынысымен үндестірген ерекше жоба. Бұл бастама халқымыздың бай мәдениетін сақтап қана қоймай, оны жастарға жаңа форматта таныстырып, өңірлердің шығармашылық әлеуетін кеңінен насихаттайды. Осындай жобалар көбейсе, ұлттық өнердің де тынысы кеңейе түседі,» – деді ақын.

 

Айбек Қалиевтің айтуынша, 2025 жылғы «Алтын домбыра» өзіне бұйырған сәттен бастап бұл марапатты халыққа көрсету оның азаматтық парызына айналған.

 

«Қостанай облысының атынан келген соң, «Алтын домбыраны» елорданың тұрғындары мен қонақтарына көрсетуге мүмкіндік туғанына ерекше қуаныштымын. Бұрын бұл марапат жеңімпаздың өңірінде ғана сақталатын. Енді оны халық өз көзімен көріп, ұлттық өнердің қасиетін тереңірек сезіне алады. Бұл – айтыс өнерін насихаттаудың жаңа қадамы,» – деді ол.

 

Айбек Қалиев – қазақ айтыс өнерінің көрнекті өкілдерінің бірі. Ол 1978 жылы Торғай өңірінің Тәуіш ауылында дүниеге келген. Л.Н. Гумилев атындағы Еуразия ұлттық университетін үздік тәмамдап, ұзақ жылдар бойы ғылым мен білім саласында еңбек етіп келеді. Ақындық пен ғалымдықты қатар алып жүрген ол бүгінде ұлттық руханияттың жанашыры ретінде көпшілікке кеңінен танылған.

 

Creative Aimaq жобасы еліміздің түкпір-түкпіріндегі қолөнершілерді, дизайнерлерді, суретшілерді, зергерлерді, креаторлар мен өнер иелерін бір алаңға тоғыстырып, өңірлердің шығармашылық әлеуетін танытуға бағытталған. Ұлттық мұраны заманауи форматпен ұштастыратын бұл бастама мәдениет пен креативті индустрияның жаңа мүмкіндіктерін ашып келеді.