#REPOST @qostanai_tany - Шілде айының алғашқы жексенбісінде елімізде Ұлттық домбыра күні кең көлемде аталып өтеді. Қазақтың қасиетті қара домбырасы – халқымыздың жан дүниесін, тарихын, салт-дәстүрі мен мәдениетін ұрпақтан ұрпаққа жеткізіп келе жатқан киелі мұра. Ұлттың рухын асқақтатып, елдік болмысымызды айшықтайтын қос ішекті аспап бүгінде ұлттық нышандарымыздың біріне айналған

Осы мерекеге орай Қостанай қаласындағы «Ұлы дала» паркінде «Домбыра – жанымыздың үні» атты мерекелік концерт ұйымдастырылды. Жағалау саябағына жиналған қала тұрғындары мен қонақтары ұлттық өнердің әсем әуеніне бөленіп, ерекше рухани кештің куәсі болды.

Концерттің ең әсерлі сәттерінің бірі – 155 домбырашының қатысуымен өткен ауқымды флешмоб болды. Домбырашылар бірінен соң бірі «Жастар биі», «Тепең көк», «Келіншек», «Сал күрең», «Балбырауын», «Еркесылқым» және қазақ күй өнерінің інжу-маржаны «Адай» күйлерін орындады.

Мерекелік бағдарламаның шымылдығын «Мирас» қазақ халық аспаптары этнографиялық ансамблі мен «Мирас» би ансамблі «Той бастар» күйімен ашты.

Мереке аясында қолөнер шеберлері киіз үйде көрме ұйымдастырды. Белгілі қолөнершебері Мұхамеджан Рахалиевтің авторлық домбыралар көрмесі де көпшіліктің қызығушылығын тудырды. Шебер өзінің қолынан шыққан түрлі пішіндегі, ерекше нақышпен безендірілген домбыраларын көпшілік назарына ұсынды.

– Домбыра – халқымыздың жаны. Әр домбыраның өз үні болады. Жастардың ұлттық аспапқа қызығушылығы артып келе жатқаны қуантады. Осындай мерекелер ұлттық өнерге деген құрметті күшейтеді, – дейді шебер.

Кешке келген көрермендер де ерекше әсерлерімен бөлісті.

– Осынша көп домбырашының бір уақытта күй орындағанын алғаш рет көрдім. Қоңыр үнді тыңдағанда бойыңды мақтаныш сезімі билейді. Осындай іс-шаралар балаларымыздың ұлттық құндылықтарды құрметтеп өсуіне үлкен ықпал етеді, – дейді қала тұрғыны Гүлмира Әбілова.

Мерекелік кеш барысында ұлттық әндер шырқалып, би қойылымдары ұсынылды. Жағалау саябағына жиналған жұртшылық өнерпаздарды ыстық ықыласпен қолдап, әр күйді зор қошеметпен қарсы алды.