Торғай – талай тарлан талантты дүниеге әкелген қасиетті өлке. Сол киелі топырақтың төл перзенті Серік Тұрғынбековтің шығармашылығы – туған жердің тынысын, халықтың мұңын, ұлттың рухын жырлаған асыл мұра. Ақынның әр өлеңінен туған елге деген сағыныш, адамзатқа деген ізгілік, уақыттың терең философиясы мен өмірдің мәні айқын сезіледі. Сондықтан да оның жырлары бірнеше буын оқырманның жүрегінен орын тауып келеді.

 

Мерейтойлық кеште ақынның сан қырлы шығармашылық жолы кеңінен дәріптеліп, қазақ әдебиетіне қосқан сүбелі үлесі ерекше аталып өтті. Зал төрінен орын алған ардақты ағалар мен ақ жаулықты аналар, зиялы қауым өкілдері, ақын-жазушылар, өнер майталмандары мен жастар бір шаңырақ астында бас қосып, жыр кешінің шынайы рухын сезінді.

 

Кеш барысында Серік Тұрғынбековтің жүрек қылын тербейтін өлеңдері оқылып, оның сөзіне жазылған әндер шырқалды. Ақын шығармаларынан қойылған әдеби-сазды композициялар көрермен көңілін толқытып, кештің мазмұнын байыта түсті. Әрбір оқылған жыр мен орындалған ән көрерменді ойға жетелеп, туған жерге, елге деген сүйіспеншілікті тереңдете түсті.

 

Кештің әсерлі сәттерінің бірі – ақынға деген ел ықыласының ерекше көрінісі болды. Қостанай облысының әкімі Құмар Ақсақалов мерейтой иесін Мемлекет басшысының атынан құттықтап, Алғыс хат пен «Алтын барыс» төсбелгісін тапсырды. Аймақ басшысы құттықтау лебізін жеткізіп, арқалы ақынға ел азаматтарының атынан автокөлік мінгізді.

 

Серік Тұрғынбековтің 80 жылдық мерейтойына арналған бұл шығармашылық кеш – руханияттың мерекесіне айналды. Жырдың қасиетін ұлықтап, сөздің киесін қастерлеген тағылымды басқосу көпшілік жүрегінде ұзақ сақталары анық. Өйткені халқымен бірге жасайтын ақынның ғұмыры – оның жырларында. Ал сол шығармалар ұлт рухын асқақтатып, келер ұрпаққа жол көрсетер шамшырақ болып қала бермек.