QOSTANAI TAŃY: Темір тұлпар, төсбелгі, талантқа тағзым… Тобыл төрінде Серік ақынның мерейтойы өтті
Бүгін Қостанайда көрнекті ақын, Қазақстанның еңбек сіңірген қайраткері, халықаралық «Алаш» сыйлығының лауреаты Серік Тұрғынбекұлының 80 жылдығына арналған кеш өтті.
Алаштың ақжал ақыны, сексеннің сеңгірін бағындырған даңқты жерлесіміз Серік Тұрғынбекұлының мерейтойы елорда төрінде басталып, туған жерінде жалғасын тапты. Бірер күн бұрын ғана кіндік қаны тамған киелі өлке – қарт Торғай төсінде дүбірлі думаны өткен еді. Міне, бүгін Қостанай қаласында атын ардақ тұтқан ағайынның ерекше құрметіне бөленді. Өнерсүйер жұрт өңірдің әр түпкірінен жиналып, Жастар сарайын лық толтырды.
Көрікті кештің кіріспе сөзін облыс әкімі Құмар Ақсақалов алып, Мемлекет басшысы Қасым-Жомарт Тоқаевтың Алғыс хатын оқып берді.
«Сіз көрнекті қаламгер ретінде шоқтығы биік шығармалар мен тағылымы мол туындылар жазып, қазақ әдебиетін дамытуға зор үлес қостыңыз. Драматургия мен аударма жанрында өзіндік қолтаңбаңызды қалдырып, ұлт руханиятына қалтқысыз қызмет еттіңіз. 80 жасқа толған мерейтойыңызбен құттықтай отырып, өзіңізге көп жылғы қажырлы еңбегіңіз үшін алғысымды білдіремін!» – делінген құттықтауда.
Өңір басшысы мерейтой иесіне Президенттің алғыс хатын және «Алтын барыс» төсбелгісін тапсырды. Сондай-ақ өзі де ыстық ықыласын білдіріп, ақжарма тілегін айтты.
«Қадірлі Серік аға! Сіз өрнекті жырыңызбен ұлттық әдебиеттің көкжиегін кеңейттіңіз. Елге, жерге, ұлт тарихы мен ұлы тұлғаларға арнаған әрбір тағылымды туындыңыз халқымыздың рухани қазынасына айналды. Сіздің өлеңдеріңіз талай әнге арқау болды. 1 наурыз күні туған күніңізбен арнайы құттықтап, елге аман-есен келіп, жерлестерімізбен қуанышыңызды бөлісіңіз деп арнайы құттықтауымды айтып едім. Енді міне, Астана қаласынан бастау алған мерейтойыңыз туған аймағымызда жалғасып жатыр. Аға, сізге және отбасыңызға зор денсаулық, ұзақ ғұмыр тілеймін! Қаламыңыз мұқалмасын, шығармашылық табысыңыз еселене берсін», – деп жүрекжарды лебізін жолдады облыс әкімі.
Осыдан соң Құмар Іргебайұлы аяулы ақынға Тобыл-Торғай азаматтарының атынан сый-сияпат жасады. «КІА Serato» маркалы автокөлік тарту етіп, қазақы дәстүрмен шапан жабу рәсімін жүргізді. Мерейтой иесіне ҚР Мемлекеттік кеңесшісі Ерлан Қаринның, ҚР Парламенті Сенатының төрағасы Мәулен Әшімбаевтың және Вице-Премьер – Мәдениет және ақпарат министрі Аида Балаеваның да құттықтау хаттары табысталды.
Шығармашылық кеш әсем әуен, әсерлі жырмен көмкерілді. 200-ге жуық әнге сөз жазған ақынның халық жадында жатталып қалған таңғажайып туындылары әуеледі. Қалың көрерменге және мерей иесіне арнап қазақ сахнасының жарық жұлдыздары – Айгүл Қосанова, Нұрболат Арзамас және облыстық филармония өнерпаздары ән шырқады. Ал І.Омаров атындағы облыстық қазақ драма театрының актерлері дүркін-дүркін дүркіретіп ақын өлеңдерін оқыды.
Толығырақ – газеттің алдағы санында.
Суреттерді түсіргендер – Василий Васильев
