Серік Тұрғынбекұлы 1946 жылы 1 наурызда Торғайдың Тосын құмында, Төлеген қыстауында дүниеге келген. 1964 жылы орта мектепті тәмамдап, еңбек жолын Жангелдин аудандық «Жаңа өмір» газетінде бастайды. Ақынның алғашқы өлеңдері осы газетте жарық көріп, әдебиет әлеміне жол ашады.

 

Кейін Қазақ радиосында, республикалық «Лениншіл жас» газетінде, Қазақ телевизиясында, «Жұлдыз», «Ақиқат» журналдарында, Мәдениет министрлігінің репертуарлық-редакциялық алқасында, Ғ.Мүсірепов атындағы Қазақ мемлекеттік академиялық балалар мен жасөспірімдер театрында және басқа да руханият салаларында жемісті қызмет атқарды.

 

Серік Тұрғынбекұлы – ақын, драматург, публицист, аудармашы, қоғам қайраткері. Оның қаламынан туған поэмалар, драмалық шығармалар, лирикалық өлеңдер мен публицистикалық мақалалар қазақ әдебиетінің алтын қорынан ойып тұрып орын алды.

 

Туған Торғайдың топырағынан нәр алып, қазақ әдебиетінің көрнекті тұлғасына айналған мұзбалақ ақынның шығармашылық жолын арқау еткен тағылымды кеште сөз құдіреті жыр оқылып, ақын сөзіне жазылған әндер шырқалып, театрландырылған көріністер ұсынылды.

 

Асқақ тұлғалы ақынның туған жерге, елге, ұлт руханиятына деген шексіз сүйіспеншілігі мен шығармашылық мұрасы кеңінен насихатталды.

 

Мерейтой кешіне мемлекет және қоғам қайраткерлері, ақын-жазушылар, әдебиеттанушы ғалымдар, мәдениет саласының өкілдері, ақынның отбасы мүшелері және өнерсүйер қауым қатысты. Қадірлі қонақтар мерейтой иесіне жүрекжарды лебіздерін арнап, қазақ әдебиетіне қосқан өлшеусіз үлесін жоғары бағалады.

 

Жангелдин ауданының әкімі Дінмұханбет Серікұлы мерейтойдың жоғары деңгейде өтуіне үлес қосқан бірқатар өнерпаздарға Алғыс хаттар табыстады. Сонымен қатар, мерейтойға арнайы келген қадірлі қонақтарға аудан атынан естелік тақталар табыстап, құрмет көрсетті.