Осындай ұлттық өнерді бойына сіңіріп, оны дәріптеп жүрген дарынды жастардың бірі – Әйет ауылының Сапар Ерғалиев атындағы қазақ жалпы білім беретін мектебінің 8-сынып оқушысы, белсенді ерікті Берік Айару Мархабатқызы.
 

Айару домбыраны жеті жасынан бастап қолға алған. Оның өнерге деген қызығушылығын байқап, алғашқы үш жыл бойы өнер мектебінде ұстазы Мәжит Әлия домбыра тартудың қыр-сырын үйретті. Кейіннен ол өз білімін жетілдіріп, күй өнерін меңгерумен қатар, айтыс өнеріне де ден қоя бастады.
 

Бүгінде Айару өнер мектебінде білім алып, ұлттық өнердің бірнеше бағытын қатар алып жүр. Ол домбырада халық күйлері мен белгілі күйшілердің шығармаларын орындап, түрлі мәдени іс-шаралар мен концерттерге белсене қатысады. Домбыраның қоңыр үні арқылы халқымыздың бай мұрасын насихаттап келеді.
 

Жас өнерпаздың жетістіктері де аз емес. «Жас тұлпар» айтысының қорытындысы бойынша облыстық кезеңде жүлделі орын иеленіп, өзінің таланты мен дайындығын дәлелдеді. Айтыс барысында оның тапқырлығы, тіл байлығы, ой ұшқырлығы мен сахна мәдениеті көрермендер мен қазылар алқасының жоғары бағасына ие болды.

Айарудың шығармашылық қабілеті тек домбыра мен айтыспен шектелмейді. Ол аудандық мәдениет үйі жанындағы театр қойылымдарына қатысып, бірнеше кейіпкердің образын сәтті сомдап жүр. Сахнадағы еркіндігі мен актерлік шеберлігі оның жан-жақты өнер иесі екенін көрсетеді. Театрдағы тәжірибе оның айтыстағы сахна мәдениетінің қалыптасуына да оң әсерін тигізуде.
 

Жас таланттың шығармашылық жолында ұстаздарының еңбегі зор. Айтыс өнеріне баулып жүрген ұстазы Мамай Ізтілеу шәкіртінің сөз саптауы мен суырыпсалмалық қабілетін шыңдап келеді. Ал өнер мектебіндегі ұстазы Айбек Балтабаев Айарудың алғыр, өнерсүйгіш, еңбекқор әрі жауапкершілігі жоғары шәкірт екенін ерекше атап өтеді.
 

Домбыра, айтыс және театр өнерін қатар алып жүрген Берік Айару Мархабатқызы ұлттық өнердің болашағы жарқын екенін дәлелдеп жүрген жастардың бірі.