Ол кісі аудан әкімі болып тұрған кезде арнайы шақырып, Меңдіқараның мәдениетін дамытуға атсалысуымды өтінген еді. Сөйтіп, осы ауданға қоныс аударып, өнер саласында қызметімді жалғастырдым. Келгеннен кейін ауданның өнерлі жастары мен мәдениет қызметкерлерін топтастырып, ұлттық өнерді насихаттауға ден қойдық.

 

Сол жұмыстардың нәтижесінде «Домбыра сазы» ансамблін құрдық. Ансамбльдің қалыптасып, шығармашылық тұрғыдан өсуіне көптеген азаматтар қолдау көрсетті. Атап айтқанда, марқұм Назымбек Молдахметовтің еңбегі ерекше болды.

 

Сондай-ақ сол кездегі аудан әкімі Қайрат Ахметов пен мәдениет бөлімінің басшысы Сәуле Укинаның қамқорлығы мен қолдауының арқасында ансамбль қанатын кеңге жайды. Ұжымның шығармашылық деңгейін көтеру үшін көп еңбек еттік.

 

Репертуар жинадық, жас өнерпаздарды тәрбиеледік, түрлі байқаулар мен фестивальдерге қатыстық. Соның нәтижесінде «Домбыра сазы» ансамбліне «Халық ансамблі» атағы берілді. Бұл да бүкіл ұжымның маңдай терімен келген үлкен жетістік. Жалпы, мен қай жерде жүрсем де өнер арқылы елге қызмет етуді мақсат тұттым.

 

Торғай – менің туған жерім болса, Меңдіқара – мені бауырына басқан, шығармашылығымды жалғастыруға мүмкіндік берген қасиетті мекен. Сондықтан бұл өңірдің мәдени өміріне аз да болса үлес қоса алғаныма қуанамын. Меңдіқарада жүріп көптеген әндер жаздым, талай талантты жастардың қанаттануына себепші болдым. Өнердің қадірін білетін, өнерпазға құрмет көрсететін азаматтардың арқасында ауданның мәдениеті де жылдан-жылға дамып келеді. Осы елдің ықыласы мен сенімі маған әрдайым шығармашылық күш-қуат беріп келеді.