Қазақтың ақиық ақыны, жазушы, Қазақстанның мәдениет қайраткері Ақылбек Шаяхмет 75 жасқа толды. Мерейтой иесі туған жері – Жітіқарада құрметке бөленді. Аудан тұрғындары қаламгерді ыстық ықыласпен қарсы алып, құрмет көрсетті.
Ақылбек Шаяхмет халықтың рухани әлемін байытып, сөз өнері арқылы қоғамның ой-санасын қалыптастырып келе жатқан тұлға. Ол өз еңбегімен ұлттың тарихын, мәдениетін, арман-мұратын кейінгі ұрпаққа жеткізуде. Қаламгер жазған әрбір шығарма - өмірдің айнасы, адам жанының терең сыры. Сондықтан ақынға құрмет көрсету - тұтас руханиятқа деген құрмет. Облыс әкімінің орынбасары Бақытжан Нарымбетов оның шығармашылығының қоғам үшін маңызын атап өтті.
Ақылбек Шаяхметтің өлеңдері мен прозалық шығармалары оқырман жүрегінен орын тапқан. Ақын туған жерге деген сағынышы мен ризашылығын білдірді.
Іс-шараға ақынның әріптестері, зиялы қауым өкілдері, оқырмандары мен жерлестері қатысты. Олардың қатарында қаламгердің бала кездегі тәрбиешісі Жаңылсын Жандырова
да болды. Оның айтуынша, Ақылбек Шаяхмет мектеп қабырғасынан-ақ алғырлығымен және ұйымдастырушылық қабілетімен ерекшеленген. Кейін бұл қасиеттер оның шығармашылық жолында да айқын көрініс тапты.
Мерейтойлық кеш концерттік бағдарламамен жалғасты. Сахнада ақынның өлеңдері оқылды. Бұл, оның әдеби мұрасын дәріптеуге арналған тағылымды кездесу болды. Іс-шара барысында Жітіқара ауданының әкімі Аслан Жаныспаев мәдениет қайраткеріне алғыс хат табыстады.
Ақылбек Шаяхметтің шығармалары оқырман қауымның жоғары бағасына ие. Қаламгердің еңбектері ұлттық құндылықтарды дәріптеп, жас ұрпақтың рухани тәрбиесіне қызмет етіп келеді. Тағылымды кездесу ақынға деген құрметтің айқын көрінісіне айналды.
