Амангелді ауданында қазақ ән өнерінің көрнекті өкілі, Қазақстан Республикасының Еңбек сіңірген мәдениет қызметкері, Қазақстан Композиторлар одағының мүшесі, Қостанай қаласы мен Амангелді ауданының Құрметті азаматы, әнші-композитор Қалибек Деріпсалдиннің шығармашылығына арналған «Көктем – қыздар» республикалық әншілер байқауы жоғары деңгейде ұйымдастырылып, өз мәресіне жетті.
Өнер мерекесіне еліміздің түкпір-түкпірінен келген талантты жас әншілер қатысып, қазақ ән өнерінің асыл мұрасын дәріптеуге үлес қосты. Байқаудың негізгі мақсаты – композитор Қалибек Деріпсалдиннің бай шығармашылық мұрасын насихаттау, ұлттық ән өнерін дамыту, жас орындаушылардың кәсіби шеберлігін шыңдау және олардың қазақ музыкасына деген қызығушылығын арттыру болды.
Қалибек Деріпсалдин – қазақ музыка өнерінде өзіндік қолтаңбасын қалдырған талантты тұлға. Оның жүрекке жететін сыршыл әндері халықтың сүйіспеншілігіне бөленіп, бірнеше буынның рухани қазынасына айналды. Сондықтан да композитор атындағы республикалық байқаудың туған жерінде өтуі ерекше мәнге ие болды.
Байқау салтанатында сөз сөйлеген Қостанай облыстық көркемөнерпаздардың халық шығармашылығы мен кинобейнеқор орталығының басшысы Дәмер Қалқаев аталмыш өнер додасының маңыздылығына тоқталды.
— Амангелді ауданында жоғары деңгейде республикалық байқау өтті. Қалибек ағамыздың сырнаймен сызылта салған әуендері ғажап. Сол ғажайып дүниелердің бүгінгі жас буынның орындауында жаңаша тыныс алып жатқаны қуантады. Байқауға қатысушылардың басты міндеті – Қалибек ағамыздың сырлы әндерін орындап, оның шығармашылығын халыққа кеңінен таныту болды. Еліміздің әр өңірінен келген таланттардың басын қосқан бұл шара ұлт мәдениетінің дамуына зор үлес қосты. Қалибек ағамыздың аруағы бір аунап түсті десек артық емес. Туған жерінде өткен бұл өнер мерекесі жоғары деңгейде ұйымдастырылды, – деді ол.
Байқауға қатысушылар екі кезең бойынша сынға түсті. Алғашқы кезеңде әр үміткер баян аспабының сүйемелдеуімен Қалибек Деріпсалдиннің бір әнін орындады. Бұл кезеңде қатысушылардың шығарманы түсінуі, әннің мазмұнын жеткізе білуі және орындаушылық шеберлігі бағаланды.
Ал екінші кезеңде жас әншілер қазақ композиторларының таңдаулы шығармаларын орындап, өздерінің вокалдық мүмкіндіктері мен сахна мәдениетін көрсетті.
Өнер додасына қатысушылардың өнеріне тәжірибелі мамандардан құралған әділқазылар алқасы баға берді. Қазылар әншілердің дауыс ерекшелігіне, орындаушылық мәдениетіне, сахнадағы өзін-өзі ұстауына және шығарманы көрерменге жеткізу шеберлігіне ерекше назар аударды.
Әділқазылар алқасының мүшесі Азамат Мұқатов мұндай республикалық деңгейдегі жобалардың жас таланттарды қолдаудағы рөлін атап өтті.
— Амангелді ауданында үлкен деңгейде республикалық байқау өтті. Қалибек ағамыздың ғажап әуендерін бүгінгі жас орындаушылардың лайықты жалғастырып келе жатқаны бізді қуантады. Бұл – ұлттық өнердің өміршеңдігінің белгісі, – деді ол.
Байқау қорытындысы бойынша үздік өнер көрсеткен қатысушылар анықталып, арнайы дипломдармен және бағалы сыйлықтармен марапатталды. Бас жүлдені Шымкент қаласының өкілі Бейсов Асылбек жеңіп алды. І орын Павлодар облысынан келген Қисатова Салтанатқа бұйырды. ІІ орынды Астана қаласының өнерпазы Қасымов Еркебұлан иеленсе, ІІІ орын Ақмола облысы Зеренді ауданының өкілі Әмірғазин Алмат пен Маңғыстау облысынан келген Молдабайұлы Таубайға берілді.
«Көктем – қыздар» республикалық әншілер байқауы Қалибек Деріпсалдиннің шығармашылық мұрасын ұлықтап қана қоймай, қазақ ән өнерінің болашағына сенім ұялатқан тағылымды мәдени шара болды. Ұлттық өнерді дәріптеген бұл байқау жас таланттардың қанатын қатайтып, олардың шығармашылық жолына жаңа серпін берген маңызды өнер алаңына айналды.
ҚР Еңбек сіңірген қайраткері, өнертану ғылымдарының магистрі, дәстүрлі әнші, мәдениет саласының үздігі, әлем халықтарының әндерін бірнеше тілде орындаушы, Абай Құнанбайұлы атындағы төсбелгінің иегері, бұрынғы Президент оркестрінің әншісі, қазіргі Роза Бағланова атындағы «Қазақконцерт» мемлекеттік академиялық концерттік ұйымының әртісі Нұрболат Арзамасұлы да байқаудың маңыздылығына тоқталды.
— Бүгін Қостанай облысының қасиетті Торғай өңірінде қазақ өнерінің көрнекті өкілі Қалибек Деріпсалдиннің шығармашылығына арналған үлкен өнер сайысы өтіп жатыр. Бұл – халқымыздың рухани қазынасын дәріптейтін тағылымы мол байқау. Қатысушылар Қалибек ағамыздың әндерін жоғары деңгейде орындап, оның шығармашылық мұрасын көрермен жүрегіне жеткізе білді. Осындай өнер додалары арқылы ұлттық ән өнері насихатталып, жас таланттардың жолы ашылады. Қалибек ағамыз қалыптастырған сырнаймен ән айту дәстүрі жалғасын тауып, оның әндері әлі талай ұрпақтың жүрегінен орын алады деп сенемін, – деді өнер қайраткері.
Осылайша, қазақтың біртуар перзенті Қалибек Деріпсалдиннің есімін ұлықтауға арналған республикалық байқау әсерлі сәттермен қорытындыланды. Өнерсүйер қауымға рухани қуат сыйлаған тағылымды шара ұлт мәдениетін дәріптеп, ән өнерінің өрісін кеңейтуге тағы бір қадам жасады.
Туған жерінде өткен өнер мерекесі Қалибек Деріпсалдиннің бай мұрасын кейінгі ұрпаққа насихаттап қана қоймай, қазақтың дәстүрлі ән өнерінің өміршеңдігін де айқын көрсетті. Ұлттық өнердің абыройын асқақтатқан мұндай игі бастамалар алдағы уақытта да жалғасын тауып, Қалибек ағамыздың сырлы әндері мен өнегелі жолы ел жадында мәңгі сақталары сөзсіз.
Амангелді жерінде өткен республикалық деңгейдегі бұл өнер мерекесі қазақ музыкасының мәңгі жасайтын асыл мұра екенін тағы бір мәрте дәлелдеді.
Ақбаян ТЕМІРЖАНОВА,
Амангелді ауданы
