Қазақтың алып тұлғалары – Ыбырай Алтынсариннің 185, Жамбыл Жабаевтың 180, Әлихан Бөкейханның 160, Мәриям Хакімжанованың 120, Кеңшілік Мырзабековтің 80 жылдығына арналған «Ұлылар – ұлттың ұстыны» атты облыстық ашық жазба айтысқа Тобыл-Торғай өңірінің ақындарын қатысуға шақырамыз.
Жобаға айтыскерлер ғана емес, поэзия өкілдері де қатысуға ниет білдірсе, нұр үстіне нұр. Ендеше, жазба айтыстың ереже-тәртібімен толығырақ танысыңыздар!
«Ұлылар – ұлттың ұстыны» облыстық ашық жазба айтыстың
ЕРЕЖЕСІ
Ұйымдастырушылар: облыстық «Қостанай таңы» газеті, «AMANAT» партиясы жанындағы «Miras» кеңесі және Қостанай облысы әкімдігі Мәдениет басқармасының «Облыстық көркемөнерпаздардың халық шығармашылығы мен кинобейнеқор орталығы» КМҚК.
Айтыстың мақсаты:
– Биыл мерейтойы аталып өткелі отырған заңғар тұлғалардың шығармашылық мұрасын насихаттау;
– қазақтың әдебиеті мен мәдениетін, рухани құндылықтарын, ұлт бірлігін, отансүйгіштік тәрбиені өлең-жырмен өрнектеу;
– өңірдегі ақындарға қолдау көрсету, өлең өнеріне талпынысы бар жаңа есімдерді анықтау;
– биыл аталып өтетін өзге де маңызды рухани іс-шараларды ақындар жыры арқылы әспеттеу.
Өтетін мерзімі: 2026 жылдың маусым-қазан айлары аралығы.
Қатысушыларға қойылатын талаптар:
– айтысқа облыстың барлық өңірінен ақындар қатыса алады;
– ақындардың жасына шектеу қойылмайды;
– қатысушылардың сөз саптасы, тапқырлығы, өлеңнің көркемдік деңгейі есепке алынады;
– айтыскердің берілген уақытты тиімді пайдалануы, тақырыпты аша білуі, қарсыласына ұтымды жауап қайтару шеберлігі бағаланады.
Айтыстың өткізілу тәртібі:
1. Айтыс үш кезеңнен тұрады:
– бірінші кезең – іріктеу кезеңі 1 маусым – 15 шілде аралығында;
– екінші кезең – жартылай финал 15 шілде – 15 тамыз аралығында;
– ақтық сын (финал) 15 тамыз – 15 қыркүйек аралығында.
2. Ақындар жеребе бойынша анықталған қарсыласымен сөз жарысына түседі;
3. Ақындар екеуара онлайн режимінде (WhatsApp арқылы) айтысады. Әр жұптың айтысы үш тәуліктен аспауы шарт, біреуі белгіленген мерзім ішінде жауапсыз қалған жағдайда жеңілген болып есептеледі. Егер екі ақын бірдей жауапсыздық танытса, айтыстан шеттетіледі;
4. Әр жұптың айтысы 4 кезектен аспауы керек. Сапасыз немесе әдепке қайшы жазылған сөздер қысқартылады;
5. Айтыс kostanaytany.kz сайтында және әр жұптың айтысы аяқталған соң газет бетінде ықшамдалып жарияланады;
6. Айтыс жеңімпаздары арнайы құрылған қазылар алқасы шешімімен анықталады.
Жүлде қоры:
1-орын – 300 000
2-орын – 200 000
3-орын – 100 000
екі арнаулы сыйлық 50 мыңнан.
Марапаттау рәсімі Республика күні қарсаңында өтеді. Мерзімі, уақыты, өтетін орны кейін хабарланады.
7. Ұйымдастыру жұмыстарын «Қостанай таңы» газеті редакциясы қамтамасыз етеді.
Айтыстың қазылар алқасы
– қазылар алқасының құрамында жергілікті ақын-жазушылар, сөз өнерінің құнын білетін кәсіби мамандар болады;
– қазылар алқасының шешімі түпкілікті және қайта қаралмайды;
– қазылар алқасының шешімі хаттамамен рәсімделеді және оның барлық мүшелері қол қояды;
– ақындар жұбының сөз сайысы талапқа сай болмаған жағдайда қазылар алқасы ортақ шешіммен айтыс мәтінін газет бетіне, сайтқа жарияламауға құқылы;
– әр жұптың айтысы әр айналымның соңында талданып жарияланады.
Өтініштер Қостанай қаласы, әл-Фараби көшесі, 90-үй мекенжайында немесе 8-707 160 83 90 WhatsApp нөмірі арқылы 2026 жылдың 1 маусымына дейін қабылданады. Өзге де ақпарат алу үшін осы нөмірге хабарласуыңызға болады.
