Қостанайда қоғам қайраткері, ақын-жазушы, аудармашы, «Алаш» сыйлығының, «Парасат» орденінің иегері Камал Әлпейісованың «Ақша бұлттай әлемі» атты шығармашылық кеші өтті.
Биыл 70 жас мерейтойын атап өтіп жатқан Камал Әбілқасымқызын таңертең облыс әкімі Құмар Ақсақалов қабылдап, құттықтау лебізін айтып, сый-құрмет көрсеткен еді. Өңір басшысы қаламгердің өмірі, ағартушылық, шығармашылық және қоғамдық қызметі кейінгі буынға үлкен үлгі екенін сөз етіп, жемін жарқын жүздесу өткізген болатын. Одан кейін де Камал апамыз қасына ере келген Аналар кеңесінің мүшелерімен бірге бірнеше маңызды жиын-отырысқа қатысты.
Ал мерейтой иесінің шығармашылық кеші «Туған жерге тағзым» атты төркіндеу сапарының тамаша түйіні болды. Жылы шырай кездесуге көпшілік қауым қатысып, рухани, тағылымды сыр-сұқбаттың куәсі болды.
Камал апамыз – сан қырлы тұлға. Қазақстандағы ілеспе аударманың мектебін қалыптастырып, көркем тәржімасымен көпті мойындатты, соңынан қалың шәкірт ертті. Жауапты қызметтер атқарып, қоғам ісіне жан-тәнін арнап еңбек етті. Қаламгерлік шеберлігімен әдеби ортаның құрметіне бөленді. Мұны кеште сөз алған азаматтар да тілге тиек етіп, ілтипаттарын көрсетті.
«Кіндік қаныңыз тамған Торғай жерінен бастау алған, аптаға созылған төркіндеу сапарының шырқау шыңы – бүгінгі шығармашылық кешіңіз. Сіз қазіргі қазақ сөз өнерінде қолтаңбасы бар бірегей қаламгерсіз. Мемлекеттік қызметте жауапты лауазымдар атқара жүріп, әдебиеттен қол үзбедіңіз. «Айтылмаған әңгіме», «Бақыт пен мұң», «Өмір бояулары», «Жапырақтары жанымның», «Жүрегімдегі жаз» атты әңгіме-өлең жинақтарымен оқырман жүрегін баурадыңыз. Оқулықтар мен сөздіктер жаздыңыз. Әдістемелік құралдар шығарып, ілеспе аударманың ауыр жүгін арқалап, ғылыми тұрғыдан зерттеп, күрделі саланы өнер деңгейіне көтердіңіз. Шетел басшылары бас қосқан небір беделді жиындарда ілеспе аударма жасауда майталман маман екеніңізді дәлелдедіңіз. Әлем жазушыларының, қазақ әдебиеті классиктерінің сөзіне дәлме-дәл тәржіме жасау таланыңызға бұйырыпты. Ұмытыла бастаған ұлттық тағамдарды жаңғыртып, мейрамханалар мәзіріне енгізуге мұрындық болдыңыз. Сан саладағы қайраткерлік қызметіңізді жоғары бағалаймыз», – деп облыс әкімінің орынбасары Бақытжан Нарымбетов қаламгер еңбегіне кеңінен тоқталды.
Кеш жүргізушісі Абылай Мауданов Камал апамызға салмақты сұрақтар қойып, қайраткердің қилы қырын аша түсті. Таным-білімі терең тұлғаның әр әңгімесі әсерлі болды. Бүгінгі буынға таңсықтау естілетін «төркіндеу» ұғымын тәпсірлеп беруі танымдық мәнге бай болды.
«Төркіндеу — қазақ халқында ежелден бар салт. Тек соны кеңес дәуірі санамыздан ысырып тастады. Оны қайта жаңғырту міндетіміз. Өйткені төркіндеудің тәлім-тәрбиелік мазмұны терең. Бұл ел мен елді жақындастыратын тін. Әдетте қазақ қызы барған жеріне орнығып, сіңіспей жатып туған жеріне жетіп келмейді. Нәрестелі болған соң жиендерін көрсетуге төркіндетеді. Ал халқымыз 60 жастан асқанда төркіндеп келудің мәндірек екенін ерекше ескерген. Өйткені тамыр жайып, ұрпақ өрбіткен, бір әулеттің ардағына айналған ананың екі жұрт үшін тағылымы терең болады деген мән жатыр», — деп тереңдете түсіндірді Камал апамыз.
Кеш үстінде жазушылық, аудармашылық, қайраткерлік еңбектері туралы естіген жанды таң-тамаша қалдыратын әңгіме-сыр қозғады. Мерейтой иесінің шашбауын көтере келген облыстық мәслихат депутаты Қырмызы Жаңбыршина мен «Қостанай таңы» газетінің бас редакторы Кенжеш Оразғалиқызы және Қазақстан Жазушылар одағының мүшесі Әбутәліп Әмір ағынан жарылып ыстық лебізін жолдап, сый-сияпат табыс етті.
Өңір өнерпаздары Камал Әбілқасымқызының сөзіне жазылған әсем әндерді әуелете шырқады. Кеш соңында ардақты апамыз дүйім жұртқа, жерлестеріне бас иіп алғысын айтып, шығармашылық еңбектерін туған жеріне тәбәрік ретінде тарту етті.
Толығырақ — газеттің алдағы санында.
