Құрманғазы атындағы Қазақ ұлттық халық аспаптар оркестрі Қазақстан Республикасы Мәдениет және ақпарат министрлігінің қолдауымен 21-23 мамыр аралығында Қостанай облысында «Халық әуені» атты концерттік-гастрольдік турын өткізеді.
Ұлттық оркестрдің гастрольдік сапары аясында Жітіқара, Лисаков және Сарыкөл өңірлерінің тұрғындары мен қонақтарына қазақтың дәстүрлі күй өнері мен ұлттық музыка мұрасын насихаттайтын арнайы концерттік бағдарлама ұсынылады.
Тоқсан жылдық тарихы бар ұлттық оркестр бұл гастрольдік тур арқылы халқымыздың бай рухани мұрасын, күй өнерінің терең тағылымын және ұлттық музыканың асыл құндылықтарын кеңінен дәріптемек. Концерт бағдарламасына Құрманғазы Сағырбайұлы, Тәттімбет Қазанғапұлы, Дәулеткерей Шығайұлы, Дина Нұрпейісова сынды ұлы күйшілердің таңдаулы шығармалары, халық әндері мен ұлттық музыка қорындағы үздік туындылар енген.
Құрманғазы атындағы Қазақ ұлттық халық аспаптар оркестрі — қазақтың төл аспаптық музыка мәдениетін кәсіби деңгейге көтеріп, әлемдік сахнада танытқан бірегей шығармашылық ұжым. Оркестрдің негізін қалаған Ахмет Жұбанов бастаған ұлт зиялылары қазақ музыка өнерінің кәсіби мектебін қалыптастырып, ұлттық өнердің алтын арқауын бүгінгі күнге жеткізді.
Концерт өтетін орындар:
21 мамыр, сағат 15:00 — Жітіқара қаласы, Аудандық мәдениет сарайы;
22 мамыр, сағат 15:00 — Лисаков қаласы, Қалалық мәдениет және спорт орталығы;
23 мамыр, сағат 16:00 — Сарыкөл ауданы, Сарыкөл аудандық мәдениет үйі.
Алматыдан арнайы келетін ұлт тарихындағы тұңғыш кәсіби ұлттық оркестр «Халық әуені» атты концерттік-гастрольдік туры аясындағы концерттеріне облыстың барша тұрғындары мен қонақтарын шақырады.
Концерттерге кіру тегін.
