Арқаның арда ақыны, жазушы-драматург Ақылбек Қожаұлының 75 жас мерейтойына орай елордада дүркіреп жыр-өлең кеші өтті.
Тобыл өңірінің қастерлі қаламгеріне арналған рухани іс-шара «Отан деп соққан жыр жүрек» деп аталды. Radisson қонақ үйінде өткен кешке исі қазаққа және тұтас түркі әлеміне аты мәшһүр ақын-жазушылар, зиялы қауым, Қостанай облысының әкімі Құмар Ақсақалов бастаған жерлестері және шайыр шығармашылығын ардақ тұтқан жырсүйер жұртшылық қатысты.
Алқалаған әлеумет аяулы ақынды ортаға алып, құттықтау лебізін жауыдырып, сый-құрмет көрсетті.
«Ақылбек ағамыздың есімі ұлт әдебиетінің дамуына елеулі үлес қосып келе жатқан қаламгер ретінде кеңінен танымал. Шоқтығы биік шығармалары арқылы халқымыздың рухани әлемін байытып отыр. Қаламынан туған 70-тен астам кітап — қазақ әдебиетіне қосылған баға жетпес рухани қазына. Біз ардақты ағамызға әрдайым қолдау көрсетуге әзірміз. Ал бүгінгі кештің елордада өтуінің мәні зор. Бұл мерейтой барша қазақтың қуанышы деп айта аламыз», — деді Құмар Ақсақалов құттықтау сөзінде.
Облыс басшысы мерейтой иесіне және жұбайы Бақытқан апамызға ілтипат көрсетіп, иығына оқалы шапан жапты.
Қазақстан Жазушылар одағы басшысының орынбасары Қасымхан Бегманов, ардакүрең ақын Ғалым Жайлыбай, Халық ақыны Әсия Беркенова кең көсіле сөйлеп, тілек-лебізін жеткізді, тарту-таралғыларын табыс етті. Кеш үстінде сенат төрағасы Мәулен Әшімбаевтың, СҚО әкімі Ғауез Нұрмұхамбетовтің құттықтау хаты да оқылды. Ақылбек ағамызға Сағадат Нұрмағамбетов атындағы медаль иеленді. Құшағы гүлге, көңілі нұрға толған ақынның өзі де тебірене сөз сөйледі.
«Бүгін мен үшін ерекше күн. Өйткені Астана төрінде алғаш рет шығармашылық кешім өтіп отыр. Бұған дейін Алматыда бірнеше рет кітаптарымның тұсаукесерін жасаған едім. Жалпы бұл маған ғана көрсетілген құрмет емес, өркені өсіп келе жатқан қазақ әдебиетіне деген жасалған ілтипат деп түсінемін. Оның үстіне, кітап көрмесіне жақында жарық көрген 14 томдығым қойылып отыр. Оған моральдық та, материалдық та қолдау жасаған және осынау кештің өтуіне жәрдем көрсеткен облыс әкімі Құмар Іргебайұлына шексіз ризашылығымды білдіремін!» — деді ағамыз.
Сахна төрінде ұлыларға ұя болған туған өлкесін таныстырып, жалынды жырларын оқып, алыс-жақынан ат терлетіп келген қалың қауымға алғысын айтты. Кеш өрнекті өлеңдермен, ақын сөзіне жазылған әсем әуендермен әрлене түсті.
Жырсүйер жұртшылық фойеге жайылған ақын еңбектерінің көрмесін тамашалап, арнайы жайылған ақ дастарханнан дәм татып, тілек-лебіз тиегін ағытты.
Толығырақ — газеттің алдағы санында.
Жандос Жүсіпбек
Суреттерді түсірген — Бердіболат Көркембаев
