Зиялы қауым, өнерсүйер жандар мәдениет қайраткері, белгілі журналист Оразалы Жақсановтың жетпіс жылдық мерейтойына орай Ілияс Омаров атындағы қазақ драма театрына жиналды.
Кеш бойы ардагеріміздің қоғамға әлі де берері мол екенін түсінгендей болдық.
Осы сөзімізге облыс әкімінің орынбасары Бақытжан Нарымбетовтің:
«Жазбаларыңызда қоғамның дүмпуін дөп басып, бикітерге жете беріңіз!» – деген осы кештің алдындағы қабылдауында айтқан сөзі серпін бере түскендей.
Бұл – алыстаған сайын биіктен көрінген тұлғалармен терезесі тең жүрген заңғар журналист Оразалы Жақсановқа берілген үлкен халықтың ілтипаты еді. Орынбасары оқып берген облыс әкімі Құмар Ақсақаловтың құттықтау хатында осынау орамдар тізбектелген.
«Түркі дүниесінің астанасы – Түркістан облысы Сарыағаш ауданының Дербісек ауылында туып-өстік. Қазірдің өзінде жиырма мың халқы бар елді мекенде әкеміз қой бақты. Сол кезде интернатта білім алып, қоғамның кейбір тұстарын қағазға түсіруге құштар болдым. Басында ойымды өлеңмен өрнектеп, он екі жасымнан аудандық газетке мақала жариялай бастадым. «Қызыл ту» газетін ол уақытта бес мыңнан астам тұрғын жаздырып алушы еді», – дейді Оразалы Отынбайұлы әңгімесінде.
Бұрын газет бетінде көретін асқар тұлғаның мерейтойлық кешіне жиналған қауым осы жолы тірідей қауышып, әңгімешіл тағы бір қырынан тани түскендей.
«Біздің заманда азаматтық әскери борышты өтеу бірінші орында тұратын. Украина елінде қызмет еттік. Бірде дивизиямызға жарты әлемге әйгілі София Ротарудың келе қалмасы бар ма..!? Сөйтіп солдаттардың арасынан офицерлер мені таңдап, әншіге құрмет көрсетуді тапсырды. Сұхбат құрып та үлгердік. Сол кезде «Слава родину» атты әскери үнпарағымыз болды. Соған материал дайындап беріп отырдым. Кейін ол шаруаның Алматыдағы Қазақ университетіне түсуіме пайдасы тиді», – дейді мерейтой иесі.
Әскери бөлімне Алматыдағы оқу орнына оқуға қабылдауға ұсыныс хат жөнелтілді. Осылайша әскерде рота хатшылылығының қызметтерін атқарып, партия мүшесі болып оралған Оразалы Отынбайұлын факультет деканы Темірбек Қожекеев топ басшысы етіп тағайындайды. Кезінде Мәдениет министрі болған Мұхтар Құлмұхамедпен студент шағы бірге өтті.
«Алматыда жүріп Қостанайдың қызымен көңілім жарасты. Университеттің соңғы курсында кішігірім той жасадық. Сол тойға Мұхтар досым асабалық етті. Сыйластығымыз әлі күнге үзілген жоқ», – дейді ол.
Содан бергі қырық жылдан астам уақыт Тобыл төрінде Зора Қалиақпарқызымен ғұмыр кешіп келе жатыр. Алтын қасықтай үш ұлы ер жетті. Оның жиырма жылын «қара шаңырақ» Қостанай таңы» газетінде өткізді.
«Ол кезеңде бүгінмен салыстыру қиын. Орысша хатты аударып, мақалаға ұқсатып аламыз. Оны апарып тергіземіз. Пленум болған сәтте типографияға түнейтінбіз. Сол қыруар еңбектің арасында осы Ораз екеуміз бір шепте жүретінбіз. Кейін қалалық газетте де жұмыла жұмыс істедік. Сонда бұның ізденімпаздығына қызығатынбыз. Бірде жетімдер үйінен бір баланы тауып алып, «Қазақ баласы кімге керек?» деген мақала жазды. Осы жазбасы арқылы Оразалы бір тағдырды түзеген қаламгер», – деп атап өтті әріптес ағасы, кезінде «Қостанай таңы» газетін он жыл басқарған Жайберген Болатов.
Залда отырғандарды Мараттың бұл жайы елжіретті.
«Қостанайдың КСК шағын ауданында балалар үйі болғанын білесіздер. Сол жерде бір іс-шара өтетін болып, редактор жұмсап жіберді. Концерт жайына қалып, сонда бір балаға ерекше көзім түсті. Көкейімде қазақтың баласы ғой, қолғабыс етейін деген ой маза бермегендей күй кештім. Мақаланың шығуы мұң екен қоғамда үлкен резонанс тудырды. Редакцияға хабарласып, келушілер жиіледі. Содан торғайлық қазақ келіншек Маратты асырап алды. Қазір балалы-шағалы. Ертай қажы қамқорлығына алып, әлі күнге дейін сонда қызмет етеді. Кездескен сайын алғысын жаудырып жүр», – деп тебіренді.
Бүгінде отыз кітаптың авторы атанған Оразалы Отынбайұлының ғұмырының бір бөлшегі осы облыстың бас мешітімен тығыз байланысты.
Ол туралы облыстық мешіттің наиб имамы Бақытжан қажы Икрамыұлы баяндап, рухани ұжым атынан Ұмра қажылыққа жолдама сыйлады.
Осы отыз кітабының алпыс пайызын елге мәдени еңбек сіңірген тұлғаларға арнады. Қостанайдың қазақ театрында бас қосқан көзі тірі кейіпкерлері қоғам қайраткеріне үсті-үстіне шапан жапты. Кеудесіне Ахмет Байтұрсынұлы атындағы Қостанай өңірлік университетінің атынан Ахмет Байтұрсынұлы төсбелгісі тағылды. Қостанай қаласы әкімдігі, AMANAT партиясы мен Журналистер Одағы Алғыс хаттарын аманаттап, алыстан ат терлетіп жеткен ауылдастары сый-сияпатпен ардақтады.
Айбек ЖҮЗБАЙ
