Аймақ руханиятының айшықты оқиғаларының бірі – XXXVIII «Өнеріміз саған, Қазақстан!» облыстық көркемөнерпаздар байқау-фестивалі Жанкелдин ауданында өз жалғасын тапты.
Дәстүрлі түрде ұйымдастырылып келе жатқан мәдени шара биыл Қазақстан Тәуелсіздігінің 35 жылдығы мен Қостанай облысының 90 жылдығына арналды. Өнер мерекесіне 141 қатысушы тартылып, байқау талаптарына сәйкес он бір жанр толық қамтылды. Бұл – Торғай өңіріндегі шығармашылық әлеуеттің кеңдігін, өнердің сан қырлы дамып келе жатқанын көрсетеді.
Кеш шымылдығы философиялық мазмұндағы бейне көрініспен түріліп, көрерменді өнердің мәні мен адам болмысының терең иірімдеріне жетеледі. Алғашқы болып сахна төріне Қонысбай Әбіл атындағы «Ғасырлар пернесі» халық ансамблі көтерілді. Музыкалық бағдарламаның шымылдығын ақын Жандос Жүсіпбектің сөзіне жазылған «Қарт Торғайым – қастерлім!» арнауы ашты. Оны орындаған әнші Жәуке Оңдаған туған жерге деген сағыныш пен құрметті жүрекке жеткізе білді.
Фестиваль аясында халық әндері мен күйлер, хореографиялық қойылымдар, авторлық және заманауи бағыттағы шығармалар көрермен назарына ұсынылды. «Көктем сазы» биі жеңіл де әсем қимылдарымен тәнті етсе, «Көктүрік» этно-композициясы тарихи рухты бүгінгі заманмен сабақтастыра білді.
Биылғы байқаудың жаңалығы – Болат Хамзин атындағы өнер мектебі ұстаздарынан құрылған этно-ансамбльдің сахнаға шығуы. Ұжым ұлттық музыканы жаңаша өңдеуде ұсынып, көрермен ықыласына бөленді. Жас ақын Ерболат Айтан «Тау Торғай» атты авторлық туындысын әсерлі орындап, көркем сөз өнерінің де лайықты деңгейде екенін көрсетті.
Биыл Қостанай облысының құрылғанына 90 жыл толып отыр. Осы кезеңде өңір мәдениетіне өлшеусіз үлес қосқан тұлғалардың еңбегі ұмытылған емес. Солардың бірі – сазгер Қалибек Деріпсалдин. Кеш барысында оның «Қостанай» әні Сүйінғариндер отбасылық ансамблінің орындауында шырқалып, көрерменге ерекше әсер сыйлады.
Фестиваль сахнасында әзіл-сықақ жанры да өз орнын тапты. «Мірдің оғы» әзіл-сықақ театры (жетекшісі Шыңғыс Садуақасов) көрерменге көтеріңкі көңіл-күй сыйлап, Сейіт Кенжеахметовтің «Айтылмайтын әңгіме» қойылымын сахналады.
Кеш барысында ұсынылған «Миллион алых роз» композициясы форматтық жаңашылдығымен айшықталды. Перформанс үлгісінде өткен бұл нөмірде суретші Самұрат Ерік ән орындалып жатқан сәтте қазылар алқасының бейнесін салып, сахна өнерінің тың қырын көрсетті.
Сондай-ақ «Сиқырлы реалити» иллюзионизм шоуы да көпшіліктің қызығушылығын тудырды. Жанат Әлібекованың шеберлігі көрермен тарапынан жоғары бағаланды.
Фестиваль аясында Қостанай облысының 90 жылдығына арналған кітап көрмесі ұйымдастырылып, өңірдің тарихи-мәдени жетістіктері кеңінен насихатталды. Ақын, ҚР Жазушылар одағының мүшесі Абылай Маудановтың «Өр Торғай – алтын бесігім!» атты жаңа әні көпшілік назарына ұсынылды. Сонымен қатар өңірдің астықты аймақ ретіндегі ерекшелігі көрмелерде көрініс тауып, нан өнімдерінен жасалған туындылар мен мазмұнды макеттер көрермен көңілінен шықты. Масақ үлгісіндегі ерекше костюм өнер мектебінің мұғалімі Гүлмира Тасмағамбетованың шығармашылық ізденісінен туған.
Жанкелдин ауданының әкімі Бидашев Дінмұхамбет фестивальдің маңызына тоқталып, өнерпаздарға сәттілік тіледі. Сонымен қатар мерейтойлық жылдың мәніне ерекше назар аударды.
Жалпы, Торғай төрінде өткен бұл фестиваль – мазмұны терең, ұйымдастырылуы жоғары деңгейдегі, өнердің сан қырын тоғыстырған тағылымды мәдени оқиға болды.
Әрбір қойылымнан шынайылық пен ізденіс айқын байқалып, көрерменге рухани серпін сыйлады.
«Былтырғы жылмен салыстырғанда, биылғы фестивальде айтарлықтай өсу бар. Қатысушылар жақсы дайындықпен, көтеріңкі көңіл-күймен келген. Мәдениет қайраткері Шолпан Қорғанбек арнайы Астана қаласынан шақыртылып, оркестр және ансамбльмен этно бағытында жұмыс жүргізіпті. Сондай-ақ облыстан жас режиссерлер тартылып, концерттік бағдарлама кәсіби деңгейде жасақталған. Одан кейін Жәуке Оңдағанның орындауындағы арнау ерекше әсер қалдырды, мәтіні де, мазмұны да өте сәтті шыққан. Аудандардағы өнер ұжымдарын көріп жүрміз ғой, дегенмен бұл жолы Данияр Амандықтың жеке аспаптық орындауы тың жаңалық болды. Торғайдың биші қыздары да жоғары деңгейде өнер көрсетіп, заманауи билермен қатар «Көктем сазы» биін әсерлі жеткізді. Әншілердің де кәсіби деңгейі өскен. Соның ішінде Мирас Әбдікәрім кәсіби біліктілігін шыңдап келіп, жеке орындауда өзін жақсы қырынан көрсетті. Жалпы, өнер мерекесінде осындай ауқымды жетістіктер байқалды», – деп баға берді қазылар алқасының мүшесі, ҚР мәдениет саласының үздігі Батырбек Байназаров.
Айта кету керек, мәдени шараның жоғары деңгейде өтуіне аудан әкімдігінің қолдауы зор болды.
«Іс-шараның сәтті ұйымдастырылуына қаржы бөлініп, аудан әкімі атынан өнерпаздарға ықылас гүлі табысталды. Сонымен қатар Қазақстан Композиторлар одағының мүшесі, танымал мәдениет қайраткері Шолпан Қорғанбек арнайы Астанадан шақыртылып, өнерпаздармен жұмыс жүргізді», – дейді аудандық мәдениет және тілдерді дамыту бөлімінің басшысы Жанар Шалабаева.
Шұға ҚОҢҚАБАЙ
Суреттерді аудандық мәдениет және тілдерді дамыту бөлімі ұсынды
