«Өнеріміз саған, Қазақстан!» ХХХVІIІ облыстық көркемөнерпаздардың Халық шығармашылығы байқау-фестивалі Арқалық қаласын да дүбірге бөледі.
Жыл сайын ел мен елді елдестіріп, жас талаптардың жолын ашатын дәстүрлі байқау биыл Қостанай облысының құрылғанына 90 жыл толуына арналған.
Ұзақ жылдардан кейін қайта қалпына келтіріліп, заманауи жөндеуден өтіп, жабдықталған Арқалық қалалық мәдениет сарайы дәстүрлі өнер шеруін шөліркеген халыққа мейірі қанғанша тамашалауға мүмкіндік берді.
Салтанатты шақта қала әкімі Әмірхан Асанов құттықтау сөз сөйлеп, жылы лебізін білдірді.
«Биылғы өнер мерекесі Қостанай облысының – 90 жылдық мерейтойымен қатар еліміздің рухани кеңістігінде өзіндік орны бар аяулы шаһарымыз Арқалық қаласының — 70 жылдық мерейтойымен тұспа тұс келіп отыр. Бұл біз үшін ерекше мәнге ие тарихи сәт болып табылады. Қостанай өңірінде дәстүрлі түрде өткізіліп келе жатқан «Өнеріміз саған, Қазақстан!» ХХХVІIІ облыстық көркемөнерпаздардың Халық шығармашылығы байқау-фестивалі өңірдің мәдени тынысын айқындайтын маңызды шаралардың біріне айналған. Бүгінде бұл фестиваль өңірдің өрісін кеңейтіп, таланттарды танытатын бірегей жоба ретінде мойындалып отыр», – деп атап өтті қала әкімі Әмірхан Асанов.
Жаңа ғимарат, жаңа сахна, жаңа құрал-жабдықтар өнерге қадам басқан жастардың қуанышын еселей түскені анық байқалады.
Жоғары сән-салтанатымен шымылдығын ашқан өнер шеруінде облыс орталығынан арнайы ат терлетіп келген қазылар алқасы, құрметті қонақтар таныстырылып, ән мен жырға, күмбірлеген күйге, мың бұралған биге кезек берілді.
Бір демде тамашаланған қала көркемөнерпаздарының концертінен кейін қазылар алқасына сөз беріліп, өнер майталмандары әрқайсы өз салалары бойынша баға берді.
Талдау түйінінде іс-шараны ұйымдастырушылар тарапынан қазылар алқасының төрағасы «Облыстық көркемөнерпаздардың халық шығармашылығы мен кинобейнеқор орталығы» КМҚК басшысы Дәмер Қалкаев қорытынды есебін жариялады.
Нәтижесінде: Халықтық қазақ ұлт аспаптар оркестрі орындаған (жетекшісі — ҚР Мәдениет қайраткері Боранбай Әбенов) Құрманғазының «Сарыарқа» күйі, Кенен Әзірбаевтың «Жаса Қазақстан» әні — орындаған Мүратбек Әбдісалықов, Халықтық қазақ ұлт аспаптар оркестрінің «Күй шашу» күйі, Ибрагим Ескендірдің «Аманат» әні — орындаған облыстық, республикалық байқаулардың лауреаты Айару Дәулет, қалалық мәдениет сарайының «Шабыт» театр студиясының (жетекшісі — Ербол Әбжалов) «Қостанай мен Арқалық – егіз ұғым» сахналандырған қойылымы, Нұрғиса Тілендиевтің «Ата толғауы» күйіне қойылған «Асатаяқ» биі – орындаған «Арқа сазы» ұлт аспаптар ансамблі, «Ақбота» халық би ансамблі (жетекшілері — Әділ Ақан, Аружан Ембергенова), Халық күйі «Жаймақоңыр» — орындаған «Арқа сазы» ұлт аспаптар ансамблі (жетекшісі – Әділ Ақан), Абайдың «Желсіз түнде жарық ай» өлеңі – орындаған «Інжу-маржан» үлгілі вокалдық тобы, «Дәстүр биі» және «Ұйғыр биі» билері – орындаған «Ақбота» халық би ансамблі (жетекшісі – Аружан Ембергенова), Амантай Жұмашевтың «Аққу дастан» туындысы – орындаған біріккен хор (жетекшісі Динара Шушаева, концертмейстер Қуаныш Елеупова) ең үздік бағаға ие болды. Сондай-ақ, режиссерлық жұмыс пен концерт жүргізушілердің еңбектері де ең жоғары бағалауға қол жеткізді.
Өнердің дүбірлі додасының құрметіне қаланың жоғары және арнаулы оқу орындары мен кітапханалар тақырыпқа сай көрмелерін ұсынды.
Мұрат ЖҮНІСҰЛЫ
Суреттерді түсірген – автор
