Делегация мүшесі, кәсіпкер Нұрлан Жаманов осы жерде әруақтарға бағыштап құрбандық шалды. Ардагерлер, оқушылар сапар аясында тарихи нысандарда болып, ел тарихымен етене танысты.

 

Арқалықтың ақ пейілін ала келген бұл сапар – өткен мен бүгіннің сабақтастығы іспетті. Сапарда қазыналы қарттар мен өскелең жас буынның қатар жүруі – үлкен мәнге ие.

 

Сапардың мақсаты да тарихымызды тану, киелі орындарға тағзым ету, ұрпақтар арасындағы рухани байланысты нығайту еді.

 

Түркістан кітапханасында өткен келелі жиында Торғай топырағының талантты жастары, қала әкімі Әмірхан Біркенұлының ықпалымен жыл сайын өтуі дәстүрге айналған мың домбыра күй орындаушылар дүбірлі өнер жәрмеңкесінің қатысушылары жас жеткіншектер әйгілі күйшілердің «Жастар», «Желдірме» атты күйлерін нәшіне келтіре орындап, өз талаптарын ұштап сөз маржандарын кестелеген Өзбекәлі аталарына арнау жырларын оқыды.

 

Қала әкімі Әмірхан Асанов, ардагерлер Қайырден Жиенбаев, Қаратай Нұрмановтар сөз сөйлеп, сапар мұратын ашты. Елге баталарын берді. Өз-ағаңның туған жері қонақтарына құшағын айқара ашып, шынайы пейіл-мейірімен қазақы салт-дәстүрімізге сай дәм-тұзын, ән-жырын ақ түйенің қарнын жарып, ағынан ақтарыла ұсынды.

 

Арқа төсінен елдік мүдде мен рухты көздің қарашығындай аялап келген ел ағалары мен оқушылардан құралған делегацияға Түркістан қаласы әкімінің орынбасары Мадияр Бақтыбайұлы, Өзбекәлі Жәнібектің қарындасы Айғаным Серім мен немересі Азель Бауыржанқызы зор алғыстарын айтып, ыстық ықыластарын білдірді.

 

Экспедиция жол бойы қатпарлы тарих қойнауынан сыр шерткен аты айдай әлемге мәшhүр Сауран қалашығына да арнайы ат басын бұрып, ел қайнап өмір сүрген жердің тарихымен танысты. Жол бастауының айтуынша бұл қаланың соңғы тұрғыны ХIХ-шы ғасырда дүниенің өзгеруіне байланысты тастап шыққан.

 

Ежелгі өркениет табы бұл қалашықта да сайрап жатыр.