Арнайы экспедиция мемлекет және қоғам қайраткері Өзбекәлі Жәнібековтің 95 жылдығына орай киелі Түркістан қаласына аттанды.
Өз-ағаңның мәдениетіміз бен өнерімізді дамытуда, ұлттық құндылықтарымызды түгендеуде үлкен еңбек жасап, көптің құрметіне бөленгені мәлім. Бір өңірдің ғана емес, тұтас қазақ елінің рухани көшбасшысы бола білді.
Сапар алдында сөйлеген сөзінде қала әкімі Әмірхан Асанов:
«Өзбекәлі Жәнібектей аталарының өмір жолымен таныссын деген ниетпен оқушылар Санжар Керімбайдың «Өзбекәлі және мәдени майдан» кітабын оқып, сол бойынша эссе жазу туралы бастама көтерген едік. Сол эссе байқауының жеңімпаз-жүлдегерлерінен құралған 25 оқушы арамызда тұр», – деп атап өтті.
Өзбекәлі Жәнібектей біртуар тұлғаның мағыналы ғұмыры, ел игілігі үшін жасаған еңбегімен танысқан бұл жастарымыз әрі қарай Өз-ағаңның кесенесіне барып, рухына тағзым етпек.
«Бүгін біз жастар үшін тәрбиелік мәні зор, қарттарымызға рухани демалыс сыйлайтын сапарға жүргелі тұрмыз. Өздеріңіз білетіндей, киелі Түркістан жері тарихы терең, көптеген құнды мәдени мұраларымыз сақталған, бірқатар ұлы тұлғаларамыз мәңгілік пана тапқан жер. Сапар барысында екі жарым мың шақырым жолды артқа тастай отырып, осындай тарихи-киелі мекендерде болып, көптеген тарихи мәліметтерге қанығатын боламыз», – деді Әмірхан Біркенұлы.
Экскурсия – Ұлытау облысындағы Жошы хан музейінен бастау алып, Түркістандағы Арыстанбаб, Өзбекәлі Жәнібек, Қожа Ахмет Ясауй кесенелерінде, басқа да бірқатар киелі орындарда жалғасын таппақ. Әйгілі Отырар қаласының орнындағы – Отырар қалашығын, Хилует жерасты мешіті мен шығыс моншасы, мың жылдық тұт ағашын көріп, Түркістан қаласының заманға сай түрлі мәдени бағдарламаларды тамашалайтын болады.
Осы ретте, қала әкімі Әмірхан Асанов Түркістан сапарына демеушілік танытып, қолдау көрсеткен «Церера» ЖШС-нің басшысы Ибраев Ұзақ Серкіұлы мен «Самрұқ Холдинг 2030» ЖШС-нің директоры Сейтжанов Еркін Мұзафарұлына ел атынан алғысын білдірді.
Жастарымыз ұлы тұлғалардың рухына тағзым етіп, тарихи-мәдени орындарды аралап, таным көкжиегін кеңейте отырып, болашақта еліне қызмет етер жақсы азамат болып өсіп шықса деген ниет қабыл болғай!
Мұрат ЖҮНІСҰЛЫ
Суреттерді түсірген – автор
