Қала әкімі Әмірхан Асанов бастаған делегация құрамында Санжар Керімбайдың «Өзбекәлі және мәдени майдан» кітабы бойынша жазылған эссе байқауының жеңімпаз-жүлдегерлері (25 оқушы), елдің абыз ақсақалдары мен зиялы қауым өкілдері және журналистер бар.

 

Өзбекәлі Жәнібектей біртуар тұлғаның мағыналы ғұмыры, ел игілігі үшін жасаған еңбегімен танысқан бұл жастарымыз әрі қарай Өз-ағаңның кесенесіне барып, рухына тағзым етпек.

 

Қала әкімі атап өткендей экспедиция сапар барысында екі жарым мың шақырым жолды артқа тастап, тарихи-киелі мекендерде болып, көптеген тарихи мәліметтерге қанығатын болады.

 

Экскурсия — Ұлытау облысындағы Жошы хан кешенінен бастау алды.

 

Саяхатшылардың қатысуымен әйгілі Жошы хан кесенесіне зиярат жасалып, атақты «Ақсақ құлан» аңызының желісімен жасалған экспозиция тамашалады.

 

Жезқазғандықтар құрметті қонақтарын құшақ жая қарсы алды.

 

> «Бұл кешен 2021 жылы ел Президенті Қасым-Жомарт Кемелұлы Тоқаевтың бастамасымен ашылған. 2022 жылы алғашқы Ұлттық Құрылтай осы жерде өткен. Арқалық қаласының әкімі Әмірхан Біркенұлы бастаған экспедиция жолға шығады дегенде өзіміздің ұсынысымызды айтқан едік. Сапардың жол бойы Ұлытау өміріне түскенімен осы өңірдің төлқұжаты іспетті Жошы хан кесенесіне ат басын бұрса деген ойымыз болды. Біздің Серке театрының да Арқалықпен тығыз байланысы бар. Өйткені, ең алғаш Серке театрын Өзбекәлі Жәнібеков ағамыз сол жерде ашып, алғашқы қойылымын қойған», – дейді Серке Қожамқұлов атындағы Жезқазған қазақ музыкалық драма театрының директоры Досхан Сәкенұлы.

 

Экспедиция бағыты одан әрі Түркістандағы Арыстанбаб, Өзбекәлі Жәнібек, Қожа Ахмет Ясауй кесенелерінде, өзге де бірқатар киелі орындарда жалғаспақ. Әйгілі Отырар қаласының орнындағы – Отырар қалашығын, Хилует жерасты мешіті мен шығыс моншасы, мың жылдық тұт ағашы, Түркістан қаласының заманға сай түрлі мәдени бағдарламалары тамашаланады.

 

Түркістан сапарының демеушілері: «Церера» ЖШС (басшысы Ибраев Ұзақ Серкіұлы) мен «Самрұқ Холдинг 2030» ЖШС (директоры Сейтжанов Еркін Мұзафарұлы).