Мемлекет және қоғам қайраткері Өзбекәлі Жәнібековтің 95 жылдығына орай Арқалық қаласынан шыққан арнайы экспедиция киелі Түркістан қаласына табан тіреді.
Қала әкімі Әмірхан Асанов бастаған делегация құрамында Санжар Керімбайдың «Өзбекәлі және мәдени майдан» кітабы бойынша жазылған эссе байқауының жеңімпаз-жүлдегерлері (25 оқушы), елдің абыз ақсақалдары мен зиялы қауым өкілдері және журналистер бар екенін еске сала кетейік.
Өзбекәлі Жәнібектей біртуар тұлғаның мағыналы ғұмыры, ел игілігі үшін жасаған еңбегімен кітап оқу арқылы танысқан жастарымыз Өз-ағаңның кесенесіне барып, рухына тағзым етті.
Ұлытау облысындағы Жошы хан кешенінен бастау алған экскурсия Түркістандағы Арыстанбаб, Өзбекәлі Жәнібек кесенелерінде, өзге де бірқатар киелі орындарда жалғасын тапты. Қала әкімі Әмірхан Асанов өз атынан және арқалықтық ардагерлер мен зиялы қауым әруақтарға құран оқытып, құрбандықтарын шалды.
Әйгілі Отырар қаласының орнындағы – Отырар қалашығының, ондағы мешіт пен шығыс моншасының тарихымен танысты. Түркістан қаласының заманға сай түрлі мәдени бағдарламаларын тамашалады.
Өзбекәлі Жәнібеков атындағы №4 лицейде кездесу өткізді.
«Отырар – әлем ұстазы Әл-Фараби, қазақ вальсінің королі Шәмші Қалдаяқов, рух сардары Өзбекәлі Жәнібеков, әлем ақыны Мұхтар Шахановтың туған жері. Ауданның 90 жылға жуық тарихы бар. Отырар — 55 мың тұрғын мекен еткен киелі өңір. Шыңғыс ханның тұсында сын-қатерлерді бастан өткерсе, Қайыр ханның тұсында қайта гүлденген. Түп тарихы — өзінде су — кәріз құбырлары жұмыс істеген өркениеттің басы болған қала. Өнеркәсібі дамыған шамамен 30 мыңға жуық тұрғыны болған», – дейді делегацияға жол көрсеткен Түркістандағы Әзірет Сұлтан Ұлттық тарихи-мәдени қорығы-музейінің экспозиция бөлімінің басшысы Данияр Сәдуақасов.
Делегациямен аудан орталығындағы Өзбекәлі Жәнібеков атындағы №4 лицейде кездесу өткізілді.
Кездесуде Арқалық қаласының әкімі Әмірхан Асанов, Отырар ауданы әкімінің орынбасары Айдос Құлмаханов, Өзбекәлі Жәнібековтің қарындасы Айғаным Серім, Арқалық қалалық ардагерлер кеңесінің төрағасы Түбекбай Әубәкіров және басқалар сөз алып, сый-құрметтерін көрсетті. Лицей шәкірттерінің күшімен дайындаған әдеби монтаж тамашаланды.
Қазір Отырар ауданын 55 мың халық мекендейді. Өсіп-өніп, көркейген аудан. Тоқсан жылдық тарихы бар. Лицейде мыңға жақын бала оқиды. Оның ішінде 200-ге жуық бала интернатта жатып білім алады.
Кездесу барысында Өз-ағаң атындағы лицей шәкірттерінің күшімен дайындаған әдеби монтаж тамашаланды.
Өзегінің ықпалы мен жазылған өнердің қос алыбы Шәмші Қалдаяқов пен Мұхтар Шахановтың шығармашылығынан дүниеге келген «Арқалықтың ақ таңы» әні шырқалды.
Ән мен жыр, ақ бауырсақ, бал шұбатпен бірге Өзекеңе арналған көрме назарға ұсынылды.
Түркістан сапарының демеушілері: «Церера» ЖШС (басшысы Ұзақ Серкіұлы) мен «Самрұқ Холдинг 2030» ЖШС (директоры Еркін Мұзафарұлы).
Арқаның астықты өлкесі арқалықтықтардың тағылымды экспедициясының жұмысы қасиетті Түркістан жерінде одан әрі жалғасуда.
Мұрат Жүнісұлы
Суреттерді түсірген – автор
