Кешке қаламгердің перзенттері Светлана Сейітқызы, Зәмзәгүл Сейітқызы, Зейін Сейітұлы, сондай-ақ ғылым мен өнер, мәдениет пен тарих саласының өкілдері қатысты.

Ы. Алтынсарин атындағы Арқалық педагогикалық университетінің проректоры, тарих ғылымдарының PhD докторы Асылан Еділханұлы, университет деканы Гүлбаршын Спанқызы, Арқалық қаласындағы облыстық Дала өлкесі тарихы музейінің директоры Рауан Абдоллажанұлы, айтыскер ақын, Қазақстан Жазушылар Одағының мүшесі Батырлан Жұмабайұлы, аудан басшылығы мен ардагерлер кеңесінің өкілдері — кештің сыйлы қонақтары қатарынан табылды.

Жангелдин аудандық Н. Ахметбеков атындағы мәдениет үйі жанынан құрылған «Мірдің оғы» әзіл-сықақ театры кеш иесінің әзіл – сықақтарын орындап кештің ажарын аша түсті.

Арқалық қаласындағы дала өлкесі тарихы облыстық музейінің қорындағы жазушының жеке заттары апарылып, көшпелі көрме ретінде ел назарына ұсынылды.

«Көрмеде Сейіт ағамыздың өзі тұтынған жеке заттары – кездігі, қағазы кесетін пышағы, радио қабылдағышы, нақышты оюланған кесесі, өзінің киіп жүрген ақ қалпағы т.б. заттары қойылды. Одан бөлек жазушылар одағының, «Қазақ тілі» қоғамының, «Ара» журналының тілшілік куәлігі де бар. Сейіт Кенжеахметұлы тек сатирик жазушы, этнограф ғалым ғана болып қоймай, кешегі өзі көзін көрген Нұрхан, Ахметхандардың жолын жалғап айтысқа да қатысқан суырып салма ақын да болған. Оның 1967 жылы Қостанай қаласының атынан айтысқа шығып, Рудный қаласының ақыны Назиқа Ерғалиевамен сөз сайысына түскендегі айтыс мәтіні сол уақытта облыстық газетте жарияланған. Міне, осындай сан қырлы ағамыздың өзі ұстаған домбырасы да ел назарына ұсынылды. Бұл домбыра жыл сайын ұлттық домбыра күнінде ұйымдастырылатын көрмеде тұрақты түрде көрмеге шығып жүр. Бірақ аталған іс-шараның жазушының өзінің кіндік қаны тамған топырақта ұйымдастырылуы – мән-маңызын, таным-тағылымын арттыра түсетіні анық», – дейді музей директорының орынбасары Батырлан Сағынтаев.

Іс-шараның жоғары деңгейде өтуіне ұйымдастырушылардың сіңірген еңбегі зор. Қызбел ауылдық округі әкімдігінің бас маманы Әйгерім Жұмагелдіқызы кештің басынан аяғына дейін ұжымымен бірге жүріп, барлық ұйымдастырушылық жұмыстарды ілкімді үйлестіре білді. Ал, Нұрхан Ахметбеков атындағы мәдениет үйінің директоры, «Мірдің оғы» әзіл-сықақ отауының жетекшісі Шыңғыс Рақымжанұлы сахналық қойылымдардың мазмұнды, жинақы өтуіне, шығармашылық деңгейінің жоғары болуына тікелей үлес қосты.

Кеш соңында Жангелдин ауданы әкімінің орынбасары Еренбол Қайырбекұлы мен аудандық мәдениет және тілдерді дамыту бөлімінің басшысы Жанар Асанқанқызы қорытынды сөз сөйлеп, жас өнерпаздарға марапаттар табыстады. Сонымен қатар, мәдениет саласында ұзақ жыл еңбек еткен Айжамал Сабыржанқызына құрмет көрсетілді.