Қазақ поэзиясының асқар шыңы, жыр әлемінің жарық жұлдызы, мұзбалақ ақын Мұқағали Мақатаевтың 95 жылдығына арналған тағылымды іс — шара Арқалық қалалық Мәдениет сарайының қолдауымен, «Абадан» әдеби — көркемөнер үйірмесінің ұйымдастыруымен көрініс тапты.

 

Байқауға қала өңірі бойынша 36 өтінім қабылданып, нәтижесінде сахнада 32 қатысушы байқаудың нақ шеберлерін анықтау үшін өзара бәсекеге түсті.

Мұқағали – бір дәуірдің емес, бір халықтың жүрегінде өмір сүріп келе жатқан ақын. Оның өлеңдері – сағыныштан туған сыр, шындықтан жаралған шежіре. Ақынның сөзі – халықтың үні. Ал, сол үнді бүгінгі таңда жаңғыртатын-көркемсөздің жас шеберлері.

 

Байқау барысында ақиық ақынның өнегелі өмірі, даналығы, рухани асыл-мұралары кеңінен насихатталды. Қазылар алқасы: Арқалық қалалық Мәдениет сарайының көркемдік жетекшісі, облыстық-республикалық іс-шаралардың жүргізушісі, көркемсөз шебері Мейіргүл Мұсабекова, Арқалық қаласындағы Дала өлкесі тарихи облыстық музейі директорының орынбасары, айтыскер ақын, Қазақстан Жазушылар одағының мүшесі Батырлан Сағынтаев, «Арқалық қаласы әкімдігінің мәдениет және тілдерді дамыту бөлімі Тілдерді оқыту орталығының қазақ тілі курсының оқытушысы Гүлжазира Баймағанбетова сайыстың әділ өтуіне күштерін салып, әр жүйріктің лайықты бағасын берді.

Байқау қорытындысына тоқталар болсақ: А.Құнанбаев атындағы мектеп-гимназиясының жас ұстазы Ләззат Кендірбекова бірінші орынды жеңіп алды. Екінші орынды Дала өлкесі тарихи облыстық музейінен Ақбота Алдамжарова, Ы. Алтынсарин атындағы Арқалық педагогикалық университетінен Ғибрат Меңдібаев, үшінші орынды «Абадан» әдеби — көркемөнер үйірмесінен Аружан Ғалымжан, Ы.Алтынсарин атындағы гимназиясынан Нұрдана Тұрысбек, Әлисұлтан Карбозов иеленді.

 

Сондай – ақ, түрлі аталымдар бойынша Ы. Алтынсарин атындағы педагогикалық университетінен: Мұқағали Мақатаев атындағы арнайы жүлдемен Ақгүлім Қонысбек, «Көрермен көзайымы» — Думан Елубай, «Жас дарын» — Аружан Тұрсынбай марапатталды.

 

Мұрат Жүнісұлы