🖋️ Сатира – қоғамдағы кемшіліктерді, адам мінезіндегі оғаш қылықтарды, жалқаулықтарды, даңғойлықты күлкі мен әжуа арқылы әшкерелейтін өнер түрі.

 

🖋️ Белгілі жазушы, сатирик, сықақшы Сейіт Кенжеахметұлы атындағы республикалық «МІРДІҢ ОҒЫ» әзіл-сықақ театрлары байқауының 2025 жылғы жеңімпаздары – Тобыл-Торғай өңірінің мақтанышы, «МІРДІҢ ОҒЫ» әзіл-сықақ театры қалың көпшілікке «БІЗДІҢ ӘЗІЛ…» атты мерекелік кешін ұсынды.

 

🖋️ Кештің басты мақсаты – қоғамдағы өзекті мәселелерді әзіл мен астарлы ой арқылы көрерменге жеткізу болды.

 

🖋️ Мерекелік кеш барысында Сейіт ағамыздың «Айтылмайтын әңгіме», «Текті ауру», сондай-ақ Нұрлыбек Жұбатқанның «Үйлену», Бауыржан Орданың «Тіс дәрігері» атты интермедия-қойылымдары сахналанып, көрермендерге ой саларлық сатира, шынайы күлкі сыйлады. Әрбір қойылымда өмірден алынған шынайы көріністер, қоғамдағы кемшіліктер мен адам мінезі астарлы әзіл арқылы шебер бейнеленді.

 

🖋️ Кештің көркін қыздырған ерекше сәттердің бірі – «Мірдің оғынан» түлеп ұшып, тамыр жайған арқалықтық «АБАДАН» және денисовкілік «ТҮЙЕМОЙНАҚ» әзіл-сықақ театрларының арнайы қонақ ретінде шақырылып, бір сахнада бас қосуы болды. Бұл – сатира мен әзіл өнерінің сабақтастығын, шығармашылық байланыс пен достықты айқындай түскен жарқын көрініс еді.

 

🖋️ Көрермен күлкіге қарық болып қана қоймай, әр қойылымнан терең ой түйіп, сатираның тәрбиелік, әлеуметтік маңызын тағы бір мәрте сезінді. Бұл кеш – қазақ сатирасының өміршеңдігін, өңірлік театрлардың шығармашылық әлеуетін айқын көрсеткен мазмұнды мәдени шара болды.

 

🖋️ Осы аталмыш іс-шараның жоғары деңгейде өтуіне мұрындық болған аудан басшылығына және аудандық мәдениет бөлімімен мәдениет үйі ұжымына алғысымыз шексіз…