«Шаңырақ» ұлттық өнер орталығының ұйымдастыруымен екінші жыл қатарынан өнерлі отбасылардың басын қосқан «Қос жүректің әуені» атты концерт өтіп келеді. Былтыр алғаш рет ұйымдастырылып, көрерменнің ыстық ықыласына бөленген жоба биыл да аншлагпен өтті десе болады. Зал лық толып, өнерсүйер қауым отбасылық дуэттердің әсем әндерінен рухани ләззат алды.
Облыстық мәдениет басқармасының қолдауымен, облыстық халық шығармашылығы орталығының ұйымдастыруымен өткен концертке өмірде де, өнерде де қатар жүрген жанұялық жұптар мен отбасылық дуэттер қатысты. Жобаның авторы Мұрат Нағашыбай.
«Мұндай мазмұнды, тағылымды концертті алдағы уақытта кең көлемде, көктемнің шуақты мерекесі Наурыз айында өткізуді жоспарлап отырмыз», – деп атап өтті.
Концерттің бастамасы жыл айрығында облысымызда мәдениет және өнер қызметкерлеріне арналған жыл қорытындысы бойынша үздік өнерпаздар мен өнер ұжымдары марапаттаумен басталды.
Жыл үздіктерін марапаттау үшін сахна төріне облыстық халық шығармашылығы орталығының басшысы Дәмер Қалқаев шығып, барша өнер ұжымдарын құттықтап, марапаттарын табыстады.
Салтанатты шарада 2025 жылдың мәдениет саласындағы ең жарқын жетістіктері сараланып, үздіктер анықталды. Өнер – бір ғана бағытпен шектелмейді. Оның ішінде ұлттық рухты асқақтататын айтыс, терме, дәстүрлі ән, ұлт аспаптар ансамбльдері, би өнері, театр жанры, заманауи жобалар мен ірі концерттер бар. Осы салалардың барлығында да облыс өнерпаздары жоғары белестерді бағындырды.
Кеш шымылдығын республикалық және облыстық деңгейдегі көптеген жобалардың қатысушылары, түрлі марапаттардың иегерлері, қырық жылға жуық уақыт сахнада бірге өнер көрсетіп келе жатқан ҚР мәдениет қайраткері, «Ерен еңбегі үшін» төсбелгісінің иегері Қадыр – Майра Қаржауовтар отбасылық дуэті ашты. Олар «Сағыныш саздары», «Асыл жарым» әндерін орындап, кештің көркін кіргізді.
Осы сияқты Меңдіқара ауданынан келген көпбалалы өнерлі отбасы Тобыл мен Нұржамал Болатовтар көтерілді. Жұбайлар өнер жолында 45 жыл еңбек етіп келе жатыр. Бүгінгі таңда Меңдіқара ауданына қарасты Михайлов ауылында клуб меңгерушісі болып қызмет атқарады. Балалары да ата-анасының жолын қуып, үлкен сахнада өнер көрсетіп жүр. Жұбайлардың өмір бойы қол ұстасып, өнер мен өмірді қатар алып жүруі кейінгі жастарға үлгі екені сөзсіз.
Көрерменнің ыстық ықыласына бөленген жұптардың бірі – композитор, сазгер, бірнеше әннің авторы, аудандарға арналған әнұрандар жазып жүрген Жарқынбек – Гүлбақыт Деріпсалдиндер дуэті. Тобыл-Торғай таланттарының жарқын өкілдері биылғы жылды жеке шығармашылық кештерімен, облыс пен көршілес өңірлерді аралаған ән кештерімен есте қалдырды.
Облысымызға домбырашы, күйші әрі әнші ретінде танылған, қазіргі таңда Федоров аудандық мәдениет үйінде қызмет ететін Жандос пен Динара Мырзахметовтардың отбасылық дуэті де кештің сәнін келтірді.
Кеш барысында Тасқын – Жұлдыз дуэті «Алғашқы кездесу» әнін тарту етіп, көрермен көңілін толтырды. Олардың ата-аналары да көп жылдардан бері сахнада қатар жүрген жұбайлар екенін ел біледі. Ол кісілер балаларының өнерін қолпаштап көрермен қатарында отырды. Ал Қостанай ауданынан келген Бекзат – Ботакөз дуэті «Жұлдызым» әнімен сахна төрінен орын алып, кештегі ең жас өнерлі жұп ретінде ерекше ықыласқа бөленді.
Облыстық сахнаға алғаш рет дуэт болып шыққан жас өнерпаздар Бейбарыс пен Гүлжан Тойшановтар да болашағынан зор үміт күттіреді.
Кейінгі жас таланттардың ішінен суырылып шығып, өнер биігінде жүрген жұлдызды дуэт – Асхат пен Дидар Шыңғысовтар да сахна төрінде жарқырай көрінді. Олар жуырда Алматы қаласындағы республика сарайында өткен «Махаббат әлемі» атты республикалық отбасылық дуэттер концертіне қатысып, Қостанай облысының абыройын асқақтатып келген еді. Тіптен сол жақта жүріп өздерінің алғашқы бейнебаяндарын да түсіріп үлгеріпті. Жұлдызды жұптың өнері көрерменді тәнті етті.
Өнерлі жас отбасылардың қатарын толықтырған Қанат – Әсем Ражановтар дуэті де кештің мазмұнын байытты. Әнші, күйші, ақындық қабілеті бар Қанат пен ұстаздықты серік еткен Әсем Тобыл-Торғай сазгерлерінің әндерін насихаттап жүрген өнерпаздар. Олар да өздерінің кештерін беріп, «Махаббат әлемі» атты республикалық отбасылық дуэттер концертіне қатысып, көрермен көзайымына айналып үлгерген жарасымды жұп.
Кеш соңында іс-шараның жоғары деңгейде өтуіне қолдау білдірген облыстық халық шығармашылығы орталығының басшысы Дәмир Қалқаев сөз сөйлеп, өнерлі отбасыларға алғысын білдірді. Барша өнерпаздарға сый-сияпат көрсетіліп, шоқ гүлдер табыс етілді.
«Қос жүректің әуені» – махаббат пен өнердің, отбасы мен шығармашылықтың жарасымды үндестігін паш еткен, көрерменнің жүрегіне жол тапқан тағылымды кеш болып қана қоймай, өнерпаздардың тұсауын кескен, үлкен сахнаға жол ашқан игі жоба болып, болашақта да көрермен көзайымына айнала бермек.
Айтолқын АЙҚАДАМОВА
Тобыл қаласы
