Әнші Димаш Құдайбергеннің Мексика елінде Матиз есімді жанкүйері тұрады. Фортепиано мен гитарада тәп-тәуір ойнайтын өнері бар. Осы Матиздің анасы Магда Евангелистская мессенджер арқылы аркылы жерлесіміз, ақын Абылай Маудановпен байланысқа шықты.
Оның баласы Димаштың өнерін көргеннен кейін ұлттық аспабымыз домбыраны үйренгісі келгенін айтқан.
Бұл туралы облыстық шығармашылық үйінің директоры Дәмер Қалқаев былай дейді.
«Жуырда бізге белгілі ақын Абылай Мауданов хабарласты. Мексикадағы бір азамат қазақтың домбырасының үнін естіп, осындай аспаптың бар екеніне қызығушылық танытып, үйренгісі келіпті. Осындай бір аспап болса кәсіби деңгейде үйренер едім депті. Біз Рудный қаласындағы «Алтын домбыра» орталығына хабарласып, Матизге демеуші болуды сұрадық», – дейді Дәмер Қалқаев.
Ондағы балалардың домбыра үйірмесіне жетекшілік ететін Назгүл Абайқызы бірден бұл бастаманы қолдады. Ол жерде өзінің бірнеше ұстаздары екі жүзге жуық баланы тәрбиелеп отыр. Ұлттық домбыра күні өтетін іс-шараларға қатысып, республикалық деңгейлердегі фестиваль, байқауларда жүлдегер болып жүрген ұжым.
Орталық осы шаруаны қолға алып, Мексикадағы азаматпен ағылшын тілінде хат алмасты. Бүгін қостанайлықтар сыйлық домбыраны пошта арқылы салып жіберді.
«Ол біздің домбыраны Мексикага жіберу туралы жоспарымызға қатты қуанды. Қазақтың өнерін, төл аспабын үйренуіне біз де өте қуаныштымыз. Жәрдем беріп, бейне дәріс жіберіп көмектесеміз. Бізде домбыра сабағының видеолары бар. Оларды ағылшын тіліне аударып, Матизге жібереміз. Қалай үйренуге болатыны көрсетілген», – дейді Назгүл Абайқызы.
Бұл жердегі қуаныштың басы Абылайдың Димашқа жасаған сыйлығынан басталғанын айта кетейік.
«Биылғы «Дайдидау» атты кітабым шыққан. Төрт тілде жарық көріп, соны біраз чаттарға насихаттадым. Содан көп елден хаттар келе бастады. Соның ішінде Магда деген кісі сол Димаш туралы ән жазған екен. Ал менің кітабым Димаш туралы емес, ән жайында Димашқа деген сыйлығым еді. Кейін сол Мексикадан көптеген хаттар келді. Мына баланың музыкаға қабілеті бар екен. Енді олар өздері қазақ тілін үйреніп жүргенін айтты. Оның сыртында қазақ күйін үйренгісі келеді. Маған бір домбыраны ақылы түрде сатып алсам бола ма деп хабарласып отыр. Неге біз қазақтың мәрттігін танытып, қазақ өнерін құрметтеп жатқан, қазақ әніне арнап кітап шығарып жатқан адамға бір домбыра сыйлай алмаймыз деген ой келді», – дейді Абылай ақын.
Қостанайдың бұл сәлемдемесі екі аптада Мексикаға жетеді. Осы үзілісті пайдаланып, Димашқа қатысты тағы бір әңгімені айта кеткенді жөн көрдік.
Димаш Құдайбергеннің Мексикадағы жанкүйерлері Қазақстан Тәуелсіздігін Мексикада атап өтті. Алдағы жылы ол жақта домбырамен күй тартылып жатса, қазақ елінің мәртебесі тағы бір асқақтап қалары сөзсіз.
