#QOSTANAI TAŃY: Торғайда Алаш арысы Міржақып Дулатұлының 140 жылдық мерейтойына орай республикалық ғылыми-тәжірибелік конференция өтті
Ұлы тұлғаның өмірі мен шығармашылығына арналған конференция секциялық жұмыстармен басталып, пленарлық мәжілісте мерейтойлық құттықтауларға кезек берілді. Арнайы тақырыптық көрме қойылды.
Конференцияны ҚР Парламенті Мәжілісінің депутаты, тарих ғылымдарының докторы, профессор Еркін Әбіл жүргізіп отырды.
Алғашқы құттықтау сөз Қостанай облысының әкімінің орынбасары Бақытжан Нарымбетовке берілді.
Мінбердегі сөзінде әкім орынбасары конференцияның тек еске алу емес, ұлы тұлғаның идеяларын зерделеу, оны жас ұрпақ санасына сіңіру, Тәуелсіз Қазақстанның рухани жаңаруына жол ашатын терең таным мен парасатты пікір алаңы екендігін атап көрсетті.
«Міржақып Дулатұлы елінің ертеңі үшін жанын шұберекке түйген, туған халқының азаттығы жолында аянбай еңбек еткен қайраткер. Оның ұлт руханиятына, білім мен ғылымның дамуына қосқан үлесі орасан. «Оян Қазақ!» деп дүр сілкіндірген Міржақыптың үні бүгін де өзектілігін жоғалтпаған асыл мұра. «Қазақ» газетіндегі публистикалық еңбектері білім беру, ана тілі, ұлттық сана туралы айтқан тұжырымдары бүгін де өзекті, болашаққа бағыт берер темірқазық. Мемлекет басшысы Қасым-Жомарт Кемелұлы Тоқаев өз сөзінде: «Ұлт зиялыларының асыл арманы Тәуелсіздік еді. Біз сол армандардың орындалған дәуірінде өмір сүріп жатырмыз. Енді олардың аманатына адал болу басты міндетіміз» деген болатын. Бұл сөз біздің әрбір жұмысымыздың, әрбір бастамамыздың темірқазығы болуы тиіс. Міржақыптың рухани мұрасын насихаттау тек тарихты танып білу емес, жаңа дәуірдің саналы азаматын қалыптастыруға бағытталған үлкен жұмыс», – деп атап өтті облыс әкімінің орынбасары Бақытжан Нарымбетов.
Президиум төріндегі мәртебелі қонақтар Қазақтың заңғар жазушысы, жерлесіміз Төлен Әбдік, әйгілі тарихшы Мәмбет Қойгелдиев, міржақыптанушы ғалым Марат Әбсәмет сүбелі сөздің қаймағын қалқып, Міржақып Дулатұлының халқына сіңірген еңбегін жеріне жеткізе әңгімеледі.
Қабырғалы қаламгер, Қазақстанның еңбек сіңірген қайраткері Қайсар Әлім және басқалар жаңа кітаптар таныстырылымын өткізді.
Міржақыптың ұрпақтары атынан бірқатар елдің айтулы азаматтарына мерейтойлық медалдар табыс етілді.
Облыс әкімінің орынбасары Бақытжан Нарымбетов тойдың өтуіне демеушілік жасаған ел перзенттерін Алғыс хатпен марапаттады. Жанкелдин ауданының әкімі Дінмұхамед Бидашев конференцияға арнайы келіп деңгейін жоғарылатқан Міржақып Дулатұлының ұрпақтарына, конференция спикерлері және модераторына ел атынан шынайы алғысын білдірді. Міржақыптанушы ғалымдарға және Міржақыптың ұрпақтарына сый- құрмет көрсетті.
Алматай Нұрмағанбетова,
Л.Толстой атындағы облыстық ғылыми-әмбебап кітапхананың «Өлкетану және әдебиеттер» бөлімінің меңгерушісі:
«Конференцияға «Халқын оятқан қаламгер» атты көрмені әкеліп отырмыз. Көрмеміз: «Ұлтын оятқан қазақ», «Ел ертеңі үшін еткен еңбек» және «Елдің ері, Алаштың азаматы» атты үш бөлімнен тұрады. «Азаттықты аңсаған ұлт көсемі» тақырыбымен библиографиялық көрсеткіш құрастырдық. Бұл көрсеткішті алда әлде де толықтырып шығармақшымыз. Көрсеткіште Міржақып Дулатұлы жазылған материалдардың бәрі топтастырылған. Бұл оқырмандар үшін, мұғалімдерге, студенттерге өте жақсы ақпарат бере алатын көрсеткіш».
Суреттерді түсірген – автор
Жанкелдин ауданы
