«Жастар» сарайында Ұлыстың Ұлы күні Наурыз мейрамы қарсаңында халықаралық «Наурыз достарын шақырады» хореографиялық өнер фестивалі өтіп жатыр.
Ашылуына қала әкімінің орынбасары Мәжит Шүленов қатысып, баршаны құттықтады.
Би кешіне Қырғызстан, Башқұртстан, Ресей Федерациясынан және еліміздің әр өңірінен би ұжымдары келді.
Биыл фестиваль алтыншы рет өтіп отыр. Осы уақытқа дейін 80-нен астам би ұжымы қатысқан екен. Ал биылғы келген 9 ұжымның 4-і алғаш қатысып отыр.
“Ол дегеніміз, қала әкімдігінің ерекше қолдауының арқасында жүзеге асып отыр. Ондай демеу білдіретін басшылық еш жерде жоқ. Келген қонақтар қалталарынан бір тиын шығармай, өнерімен ғана бөлісіп елдеріне жетуге толық жағдай жасалған. Сол үшін облыстық мәдениет, білім басқармалары мен қалалық әкімдікке алғысымыз шексіз!” – дейді ол туралы жобаның әрі “Карнавал” би ансамблінің жетекшісі Шамиль Фахрутдинов.
Халқымыздың басты құндылығы — бейбітшілік пен бірлік. Қазақ халқының тарихын, дәстүрі мен мәдени мұрасын би фестивалі паш етіп, жалғай бермек.
Ертең фестивальдің екінші күні өтеді.
