#REPOST @qostanai_tany Сүйінші хабар! Көкшетауда өткен «Бала ақын – жас дарын» атты аймақтық оқушылар айтысында арқалықтық жас ақын Нұрислам Рағат бас жүлдені жеңіп алды
Айтыс қазақ ақыны, философ, халық ағартушысы, қазақ жазба әдебиетінің негізін қалаушы Абай Құнанбайұлының 180 жылдық мерейтойын мерекелеу аясында ұлы ақынның бүгінге жеткен бай мұрасын, рухани тағылымын өнеге ету, қазақтың төл өнерін жастар арасында насихаттау мақсатында ұйымдастырылған.
Айтысқа Астана қаласынан және Қостанай, Қарағанды, Павлодар, Солтүстік Қазақстан, Ақмола облыстарынан 14-18 жас аралығындағы 14-ақын қатысты.
«Нұрислам алғашқы айналымнан – ақ қазылар алқасының көңілінен шығып, ақтық сынға жолдама алды. Ақтық сында да қарсылас шақ келтірмей бәйгенің алдынан келіп, айтыстың бас жүлдесін қанжығасына байлады. Шәкіртім Б. Майлин атындағы №3 жалпы білім беретін мектепте 9-шы сынып оқиды. Алдағы жоспары үлкен аламандарға шақырту алған. Қазір соған дайындық үстінде», – дейді жетекшісі, айтыскер ақын Айбар Рағат.
Жеңімпаз жерлесіміз ұйымдастыру комитетінің дипломымен және қомақты ақшалай сертификатымен марапатталды.
