Еліміздің басты мерекесі

24 қазан күні Елубай Өмірзақов атындағы аудандық мәдениет үйінде ұлттық мерекеміз – Республика күні қарсаңында мерекелік салтанатты іс-шара өтті. Концерт басталмас бұрын жиналған аудан тұрғындары фойеде ұйымдастырылған аудандық музей, кітапхана көрмелерімен және өнер мектебі тәрбиеленушілерінің қолөнер бұйымдарымен танысуға мүмкіндік болды. Сондай-ақ ауданымыздың ұлттық орталықтартары мәдени құндылықтарын паш етті.
Концерттік бағдарлама «Мені елім» атты еліміздің тарихын бейнелеген прологтан бастау алды. Хореографиялық «Экзерсиз» және «Даймондс» би топтары нақышына келтіріп орындап, көрермендерге жігер берді. Сапар Ерғалиев атындағы орта мектеп оқушылары зал көрермендерімен бірге Әнұранды патриоттық сезіммен, мақтанышпен орындап шықты.
Аудан әкімі Қайсар Мыржақыпов құттықтау сөзінде 1990 жылдың 25 қазанындағы Мемлекеттік егемендік туралы Декларацияның қабылдануы қазақ халқының мемлекеттілігінің жаңғыруы мен нығаюының одан әрі үдерісін алдын ала айқындап, еліміздің жаңа тарихының бастау нүктесі болғанын атап өтті. Содан бері елімізде тұрақты экономикалық жүйе құрылып, әлеуметтік сала үздіксіз дамып, азаматтардың өмір сүру деңгейін көтеру бағытында жүйелі жұмыстар жүргізілуде. Облыс пен еліміздің стратегиялық жобаларын жүзеге асыруға ауданымыз да белгілі бір үлес қосып келеді: инвестиция тартылып, өнеркәсіп және ауыл шаруашылығы өнімдері өндіріліп, тұрғын үйлер мен әлеуметтік нысандар салынуда, жолдар мен мектептер жөнделгендігі туралы тоқталды.
Аудан әкімінің қолынан бірнеше мемлекеттік қызметкерлерге, әлеуметтік және кәсіпкерлік сала қызметкерлеріне Мадақтамалар мен Алғыс хаттар табысталды. «Жомарт жүрек» жобасы бойынша номинациялармен ауданымыздың дамуына елеулі үлес қосқан ұжымдар марапатталды.
Көрермендердің айтуынша, мәдениет үйінің өнерпаздары Ұлы мерекенің маңыздылығын жеткізу үшін бар күш-жігерін салды. Аталмыш іс-шаралар мәдениетіміздің дамуына ғана емес, қоғамдағы патриотизмдік сезімді оятуға өз септігін тигізеді.