Қуанышты оқиға

Елубай Өмірзақов атындағы аудандық мәдениет үйінің қызметкерлері үшін 16 орындық жаңа «JAC » автокөлігі кілтінің табыс етілуі қуанышты оқиға болды. Тоғызыншы қазан күні Мәдениет үйінің алдында өткен жаңа көлік кілтін табыстау рәсімінде аудан әкімі Қайсар Мыржақыпов: «Мәдени-сауықтық іс-шараларды ұйымдастыруға көлік алу туралы шешім биыл қабылданған болатын. Оған жергілікті бюджеттен жиырма бір миллион теңгеден астам қаржы бөлінді. Бұл сыйлық әншілер, әртістер, бишілеріміздің фестивальдер мен байқауларға қатысу мүмкіндіктерін кеңейтуге бағытталған. Әртістеріміздің әрдайым жолдары болсын!» деген тілек білдірді. Мәдениет үйінің басшысы Медет Байзақовтың көлік кілтін алғаны, кейін мекеме басшысының жүргізуші Ж.Қ.Ерғалиевке табыстаған сәтінен ұжым қызметкерлерінің керемет қуанышты әсерлері байқалды. Мәдениет үйінің жүргізушісі Жамбыл Ерғалиев 20 жыл қызмет етіп келе жатқын Мәдениет үйі көп жылдар бойы армандаған көлікті екінші рет алып отыр. Ж. Ерғалиевтың айтуынша, бұл салтанатты түрде беріліп отырған екінші көлік, біріншісі жолда қалдырмай өз қызметін атқарды. Шағын автобус өте ыңғайлы, сапарға қажеттінің бәрімен қамтамасыз етілген. Кабинада кондиционер және желдету жүйесі бар. Бірақ ең бастысы -қауіпсіздік. Көлік, жолаушыларды, оның ішінде жас өнерпаздарды тасымалдауға қойылатын барлық талаптарға сай.