Өмірдегі ең басты құндылық

Қазақстан Республикасында қыркүйек айының соңғы жексенбісі Отбасы күні деп белгіленген. Осы орайда Елубай Өмірзақов атындағы аудандық мәдениет үйінің қызметкерлері «Отан отбасынан басталады» деген атаумен ойын-сайыстық іс-шара өткізді.
Ойын бағдарламасы қолдан жасалған үлкен жүректі қатысушылар бір-біріне жылы лебіздер айтумен басталды. Іс-шара қонақтары ретінде ауданымыздың бірнеше отбасы болды: Әйет ауылынан Жамагөзовтар, Корякиндер, Красносельский ауылынан Шұңғұрбаевтар және Жүрсін отбасылары, сондай-ақ Тобыл кентінен ауданда өткен «Мерейлі отбасы» байқауының жеңімпаздары Сыздықовтар отбасы. Кітапхана, музей, ардагерлер кеңесі мүшелері, басқа да ұйымдардан қатысушылар болды. Қонақ ретінде келген отбасыларды әсерлі мерекемен ардагерлер кеңесінің төрайымы Р. Овчарова, аудандық кітапхана басшысы Г. Асановалар құттықтады.
Олар өз сөзінде отбасының рөлін, оның әрбір адам өміріндегі маңыздылығын атап өтті, махаббатты, жауапкершілікті, қамқорлық пен сыйластықты отбасынан алатынымызды сөз етті.
Іс- шараға қатысушылар отбасын біріктірудің сырларымен бөлісті, күлкілі отбасылық оқиғаларын еске алды, викториналарға қатысып, отбасы және отбасылық қарым-қатынас туралы сұрақтарға жауап берді.
Мәдениет үйінің өнерпаздары қатысушыларға ән-күймен керемет көңіл-күй сыйлады.