Көктем әуені.

«Көктем әуені» - осындай романтикалық атаумен Халықаралық әйелдер күні қарсаңында аудандық мәдениет үйінде мерекелік концерт өтті. Ауа-райының қолайсыздығына қарамастан, Мәдениет үйінің фойесі іс-шара басталмай тұрып лық толы болды. Ер азаматтар келген әйел затын гүл шоқтарымен, құттықтаулармен қарсы алды. Шоколадты фонтанда мерекенің сәнін келтіре түсті.
Сағат 11-30-да концерт залы толы болып, көктемгі көңіл-күй, көрермендердің күлкілері мен қуаныштары байқалды. Жиналғандарды аудан әкімі Қайсар Мыржақыпов келе жатқан көктемнің, махаббат пен үміттің мерекесімен құттықтап жылы лебізін білдірді. Ол өз сөзінде ауданымыздың әйелдері – ұстаздар, дәрігерлер, ауыл еңбеккерлері, қоғам қайраткерлері, үй шаруасындағы әйелдер, кәсіпкерлер, басшылар бүгінде өмірдің барлық саласында қызмет етіп жатқанын ерекше атап өтті. «Сіздердің адалдықтарыңыз бен кәсіби шеберліктеріңіз қоғамымызда тұрақтылық пен тыныштықты сақтауға мүмкіндік береді. Бүгін біз еңбек ардагерлеріне, Отан игілігі, оның бүгіні мен болашағы үшін аянбай еңбек еткен барша жандарға ерекше құрмет көрсетеміз», – деді Қ.Мыржақыпов.
«Көктем әуені» атты концерттік бағдарлама ең сұлу, ең сүйікті нәзік жандарға арналды. Концерттің ең кішкентай қатысушылары Шерхан Ұшқынұлы мен Дарья Назарова аналар мен әжелерге өздерінің әсерлі құттықтауларын жеткізді. Барша таланттарын залдағы нәзік жандарға ер азаматтарымыз сыйлай білді. Сахна төрінде өнер көрсеткен мекеме басшылары, дәрігерлер, ауылдық округ әкімдері де көрермендердің зор ілтипатына бөленді.
Бағдарлама бойы сахнадан құттықтаулар мен тілектер өмірге жылулық пен сұлулықты әкелетін жандарға арналды.