18 қараша күні аудан орталығында «Жастар алтын кітабы» жобасының жеңімпаздарын марапаттау рәсімі өтті. Кітапқа жаңадан он бір адамның есімі қосылды, қазір олардың саны екі жүзден асты. «Жастар алтын кітабы» Қостанай облысының бірегей жобасы және Қазақстанда оның баламасы жоқ. Оған ауданның қоғамдық өмірінде өзін жақсы қырынан танытқан белсенді жастардың есімдері енгізілген. Биылғы жылы салтанатты шара он алтыншы рет өтті. Аудан әкімінің орынбасары Марат Әлмағамбетов аудан жастарының туған өлке тарихына өз есімдерін қалдыруға мүмкіндігі бар екенін еске салды. Кітаптан спортшылардың, денсаулық сақтау саласының, білім беру, мемлекеттік қызметкерлердің, журналистердің және тағы басқа салалар бойынша ерекшеленген есімдерін табуға болады. 2022 жылғы лауреаттар қатарына Елубай Өмірзақов атындағы аудандық мәдениет үйінің екі қызметкерінің есімдері енді, олар – Таңатқан Жүрсін мен Асан Әнуарбеков. Жігіттер аз уақыт ішінде аудан түрғындарына өз өнерлерін ұсынып, тыңдармандарын бағындыра білді. Екі өнерпазымыз аудан сахнасында өнер көрсетіп қана қоймай, түрлі облыстық вокалдық байқауларында ауданымыздың намысын лайықты қорғап жүр.
