Армысың, досым!

«Армысың, досым!» деген атаумен 22 қыркүйек күні Елубай Өмірзақов атындағы аудандық мәдениет үйінде Қазақстан Республикасының Тілдер күніне арналған аудан мектептерінің ұжымдары арасында алғаш рет достық фестивалі өтті.
      Фестивальді ұйымдастырған Бейімбет Майлин ауданы әкімдігінің ішкі саясат бөлімімен бірлесіп «Қостанай облысының психологтар қауымдастығы» қоғамдық қоры болды.
      Фестивальдің мақсаты – Қазақстан халқының мәдениетінің байлығы мен алуан түрлілігімен таныстыру арқылы халықтар достығы мен туған жерге деген сүйіспеншілік идеясын насихаттау, ана тілін үйренуге деген қызығушылықтарын дамытуға ықпал ету.
       Фестивальге аудан мектептерінің 5 ұжымы қатысты. Қатысушылар қазақ, әзірбайжан және беларусь халықтарының мәдениетін таныстырды. Ұйымдастырушылардың айтуынша, елімізді мекендейтін халықтардың бірлігі, біздің нығаюымызға көмектеседі, тұрақтылық пен халықаралық келісім басты басымдық болып табылатын мемлекеттердің бірі екенімізді мақтанышпен жариялауға мүмкіндік береді.
     Фестивальдің қорытындысы бойынша бірінші орынды Бейімбет Майлин атындағы жалпы орта мектебінің «Достық» командасы иеленсе, екінші орынды «Сапар Ерғалиевтың ұрпақтары» деп аталған Сапар Ерғалиев атындағы мектептің ұжымы, үшінші орын Красносельскийдің «Smilе» командасына бұйырды. Майский және Тобыл мектептерінің командалары белсенділік көрсетіп қатысқандары үшін дипломдармен марапатталды. Ұйымдастырушылардың айтуынша, атаулы түрдегі фестивальді алдағы уақытта жыл сайын өткізу жоспарға енгізіледі.