Қостанай облысының Қамысты ауданының аудан орталығы Қамыстыда Хасенова Аружан атты жас бұлбұл өсіп келеді. Аружан 4 жылдан бері вокалмен айналысады. Оның жетекшісі Қамысты аудандық Мәдениет үйінің музыкалық жетекшісі Бейсенбаева Эльмира Ғалибекқызы мәдениет саласында 20 жылдан артық еңбек етіп келеді.
Бисембаеваның жетекшілігімен Аружан 2016 жылы облыстық «Золотой микрафон» байқауының финалисті атанып, 2017 жылы «Бала дауысы» республикалық байқауының облыстық финалистері қатарына шығып, 2018 жылы облыстық «Жарқын болашақ» байқауының лауреаты атанған.
2018 жылдың 14-15 желтоқсанында Астана қаласында Халықаралық өнер, спорт, білім және мәдениет саласындағы таланттарды қолдау қорының ұйымдастыруымен балалар мен жастар шығармашылығының «Capolovoro di dombra» және «Ubuntu» халықаралық фестиваль-сайысы өтті. «Ubuntu» фестиваль-байқауында 130-дан аса вокалистер арасынан Хасенова Аружан ІІ орынға ие болды. Бұл байқауда біздің елдің қатысушыларынан басқа, Грузия, Армения, Қырғизстаннан да келген өнер көрсетушілер болды.
Оның музыкалық жетекшісі Бейсенбаева Эльмира Ғалибекқызы – алғыс хатпен, Хасенова Аружан ІІ дәрежелі дипломмен марапатталды.
2019 жылдың 8 ақпанында «Мереке» балалар мен жасөспірімдер өнер орталығының ұйымдастыруымен Алматы қаласында «Менің Қазақстаным!» атты балалар мен жасөспірімдер арасындағы Шәмші Қалдаяқовтың әндерін орындаушылар байқауынан да Хасенова Аружан І орынды иеленіп, диплом және кубокпен марапатталды.
2019 жылдың 25-28 наурыз аралығында Астана қаласында өткен «Ақкөгершін» ХІІІ халықаралық балалар көпжанрлық байқауында І орынды иеленді. Кубок және дипломмен марапатталды.
Хасеновтар отбасы дарынды, үлгілі 4 қыз өсіруде. Аружан солардың ішіндегі ең үлкені. Аружанның Назым деген сіңілісі де әншілік өнерге бел байлап, ерекше өнерімен көзге түсіп жүргендер қатарында. Әншілік өнер Аружанға нағашыларынан дарыған.
